ORANJESTAD: Diabierna siman pasa, Minister di Enseñansa y Deporte Endy Croes hunto cu colega Minister di Energia Glenbert Croes, Parlamentario Raymond Kamperveen, director di N.V. ELMAR Sr. Anthony Irausquin, staf di ELMAR y empleadonan a atende e celebracion di inauguracion oficial di e onderstation nobo na Sabana Blanco di N.V. ELMAR. Minister Endy Croes a hiba discurso den nomber di Gabinete Wever-Croes II. A nombra e onderstation aki na honor di un ex empleado di ELMAR, Sr. Julius Egbert “Bert” Lampe, kende tabata un trahado ehemplar cu durante 38 aña a traha pa ELMAR cu hopi dedicacion y pasion. Durante e ocasion special aki, a realisa e desvelo oficial den presencia di famia Sr. Bert Lampe, den feliz memoria. E onderstation na Sabana Blanco tin un rol importante den e red di distribucion di ELMAR, mirando cu e ta transmiti coriente na cuater (4) transformer di 60 mil volt, cualnan ta na Sabana Blanco, Tanki Leendert, Palm Beach y Paardenbaai. E 4 transformernan aki hunto ta suministra mas di 10 mil cliente cu coriente, cual ta 20 porciento di e total clientenan di ELMAR na Aruba. E onderstation ta traha cu e posibilidad pa expande riba energia den futuro, considerando expansion riba proyectonan electrico y crecemento di demanda den areanan hotelero. Loke por a tuma nota ta cu e demanda pa electricidad na Aruba a aumenta y ta aumenta continuamente. ELMAR tin un maneho moderno y eficiente cu un organisacion avansa y computarisa.  E instalacion aki ta conecta riba tur smartgrid y di e forma aki ELMAR por opera y monitorea e instalacion for di distancia. E realisacion di e proyecto aki tabatin un inversion di 10 miyon florin, cual ta un logro di vital importancia pa ELMAR, como pa e comunidad di Aruba. Minister Endy Croes ta gradici henter e staf di N.V. ELMAR, stakeholders cu a coopera pa pone ekiponan ultra moderno, tur e contratistanan cu a forma parti di e proyecto grandi aki pa garantisa suministro di coriente pa nos pais, alabes ta felicita nan pa e gran trabou cu nan a haci.