Willemstad, 18 di ougùstùs 2023 – Na un momentu di reflekshon mundial riba inklushon di merkado laboral, Kòrsou ta prepará pa dal un paso importante. Un charla, ku lo tuma lugá djaweps 31 di ougùstùs próksimo den ouditorio di Universidat di Kòrsou (UoC) ta primintí di eksplorá den profundidat e tema aki, bou di e título: ‘Promoviendo un merkado laboral inklusivo na Kòrsou: eksplorando enfokenan nobo”.
E charla aki, ku ta un inisiativa di Organisashon Internashonal di Trabou (ILO), Konseho Sosial Ekonómiko di Kòrsou (SER), UoC, Alto Komisariado di Nashonnan Uní pa Refugiadonan (UNHCR) i HumanRights Defense Curaçao (HRDC), lo brinda un foro pa interesadonan sigui amplia riba e tema.
John Bliek, ku ta un distinguido miembro di e ekipo di trabou desente di e ofisina di ILO pa e region di Karibe, lo ta e oradó prinsipal. Ta spera ku su ideanan i análisis riba igualdat di oportunidat lo guia un debate fruktífero i refleksivo.
E charla aki ta yega na un momentu krítiko kaminda tin atenshon mundial pa inklusividat riba merkadonan laboral. E evento aki, ku lo tuma lugá di 09:00 pa 13:00, lo ofresé un plataforma pa reflekshoná riba integrashon di e koriente global aki den e konteksto spesífiko di Kòrsou.
E idioma di trabou lo ta Ingles, pero tin e posibilidat di intervení na Papiamentu o Hulandes, loke ta hasi e evento aki unu relevante tantu riba eskala lokal komo internashonal. E organisadónan ta aspirá un diálogo diverso, animando e partisipantenan pa eksplorá reto- i oportunidatnan pa sigui promové un merkado laboral inklusivo.
E evento aki lo representá mas ku un mero ehersisio akadémiko. E lo ta un paso konkreto den sigui fortalesé i promové un vishon integral pa Kòrsou, teniendo na kuenta e dinámika lokal i e panorama internashonal mas amplio. Interesadonan den e charla por tuma kontakto via inclusivelabormarkets@gmail.com pa mas informashon. E charla ta prometé di aportá na esfuersonan pa sigui konfigurá merkado laboral di Kòrsou, hasiendo esaki mas aksesibel i kreando oportunidatnan nobo pa tur ku ta habitá e isla.
