Rifa cu premio maximo di 10 mil florin cash, Ban Topa na Savaneta y Charla riba bida di Daniel Leo Partido Movimento Electoral di Pueblo (MEP), tin varios actividad cu lo tuma luga den e siguiente temporada nos dilanti. Lider di MEP, señora Evelyn Wever-Croes ta extende uncordial invitacion na henter comunidad di Aruba pa e siguiente actividadnan di Partido MEP.
Rifa:
Un biaha mas Partido MEP tin un tremendo rifa di cual e premio mayor ta 10 mil florin cash. Bukinan y tickets ta obtenibel cerca tur candidato di partido MEP. Ainda tin algun buki na benta. Dia 2 di juli, lo saca e ganadonan na Cede di MEP. Partido MEP ta depende riba contribucionnan di comunidad y p’esey un biaha mas ta bati na porta di cada ciudadano y sostenedor pa boso contribucion. Cu un ticket di 5 florin, bo tin e posibilidad pa gana 10 mil florin.
“Ban Topa”:
E siguiente actividad lo ta dia 6 di juli na Centro di Bario Savaneta cu un reunion “Ban Topa”, cu ta un serie di encuentronan, na unda lo bishita tur districto na Aruba. Pa cu e reunionnan aki, lo invita no solamente esnan di e districto pero Aruba en general pa bin scucha tur e informacionnan cu e candidatonan lo tin pa comparti. E encuentro di “Ban Topa” ta cuminsa pa 7 pm. Lo tin oportunidad pa tur cu desea nan preguntanan.
Charla:
E di tres encuentro lo ta dia 11 di Juli, na unda Fundacion Politico Nelson Orlando Oduber, cu ta e fundacion di partido MEP cu ta yuda cu e formacion di politiconan nobo, lo organisa un charla ‘Daniel Leo, nos protector di agricultura y economia Arubiano’. Aki lo trata e bida y logronan di señor Daniel Leo dfm, e dia di su natalicio. E motibo pa scoge tema aki ta pasobra ultimo tempo ta papia hopi di agricultura y kico mester wordo haci, y señor Daniel Leo tabata un pionero den e ramo aki. E ta importante pa semper corda e logro di nos mesun hendenan y siña di nan. Esaki mester ta un inspiracion pa nos tur. E charla lo ta dia 11 di juli na Cede di MEP pa 7 or di anochi.
Lider di MEP, den nomber di Partido MEP, ta invita pueblo en general pa bin coparti cu nos e encuentronan importante aki y keda informa riba e topiconan actual den nos pais.
