Ta di lamenta un parlamentario ta subi avion bay Hulanda mientras cu e no sa mes e
diferencia entre un Tripartite y un IPKO
Partido MEP por a tuma nota di un articulo di señor Miquel Mansur cu no ta compronde kico
ta e esencia di un delegacion di Parlamento di Aruba y unda un biaha mas, cu su prensa
comprometi, ta actua manera un Loneranger ta sali ataca MEP. Esaki pasobra Mansur no ta
gusta locual a ser treci dilanti door di Presidente di Parlamento, cu como hefe di delegacion,
cu lamentablemente den su rol tin di keda profesional y no contesta señor Mansur.
Sinembargo nos di Partido MEP tin di defende nos partido.
Señor Mansur no sa mes na cua reunion el a participa. Den su afan pa ataca Partido MEP y
expresa cu MEP ta e partido di mas bieu siendo cu e tin aliansa cu AVP cu si ta e partido di
mas bieu, ta papia di reunion di IPKO y por wak esaki riba e titulo di su articulo den 24 ora
titula: ‘MEP como partido bieu ta culpa Hulanda durante IPKO pa no culpa nan mes’.
Pero lo mas lamentable ta cu señor Mansur a participa den un reunion di Tripartite cu ta di
Aruba, Corsou y Sint Maarten. E reunionnan di IPKO mes ta cuminsa diahuebs 1 di juni. Ta
bon pa educa Mansur cu IPKO ta entre tur Parlamento di Reino, pues mayan, diahuebs lo tin
presente tambe parlamentarionan di eerste y tweede kamer di Hulanda.
Ta di lamenta cu na Aruba tin e tipo di parlamentario asina di awa dushi cu ta subi den avion
bay Hulanda mientras cu e no sa mes e diferencia entre un Tripartite y un IPKO. Anto kico
pueblo por spera di su contribucion na esaki.
Locual Mansur no a gusta den e reunion Tripartite ta cu President di Parlamento a referi cu
un gran mayoria di Parlamento no kier un RAFT pero Hulanda ta haci mal uzo di su poder pa
exigi esaki a cambio di fiansa mas abao mientras cu por haci esaki sin problema. Y sigur a
trece dilanti cu hunto como islanan ruman tin di para cu otro pa evita mas mal uzo di poder di
parti di Hulanda.
Pues MEP ta haya cu ta malgasta placa pa hiba un parlamentario den e caso aki señor Mansur
cu no sa mes e diferencia entre un Tripartite y IPKO y sigur cu no ta compronde cu ta Aruba
e ta representa y si ta Hulanda e kier defende e por bay postula su mes na Hulanda y ser elegi
pa representa Hulanda. Esaki ta e mentalidad di un bendedo di patria cu ta cla pa entrega nos
pais na Hulanda.
