Calabas/Kudawecha – Tin ora tin di puntra si corte internacional na Den Haag por tin un departamento pa abuso den deporte; un departamento cu ta trata cu crimen contra esencia deportivo. Aki na nos isla seguro no ta cubri “Post Traumatic Domino Syndrome” y si e trend di Team Snor sigui asina, muy pronto lo por lanta un fundacion “Yuda mi Dobel Seis”.

E fin di siman cu a pasa, e bario di Madiki, y muy special Madiki Kavel, a keda estilo “The Walking Dead” despues di nan encuentro cu Team Snor bou guia dje burdugu den domino Nelson “Snor” Perez. E trabuconan di Madiki a bay style di camufla bou di un nomber nobo, esta Team Dos Playa, pero Snor a djis lanta schouder y puntra “What’s in a name?”

E airco dje conocido y mundialmente famoso Domino Square Garden no a ni haya chens pa fria e luga drechi, cu ya den ‘no time’ e ekipo nobis nobis (nou ja) di Dos Playa ta para pafo ta blankea wowo y puntra nan mes ta ken a manda nan desafia Team Snor. Half time ta bay aden y e score ta brutalmente na fabor di Team Snor cu anotacion di 11 – 4! Manera nan ta bisa na Hulandes: “Men zag de bui al hangen”! Gerencia di Domino Square Garden ta parti e snacknan poco poco den pauze, estilo ‘turtle action’, pa asina duna chens n’e fanaticada pa sikiera dal un slok ya cu nan sa caba cu cualkier momento Snor por ‘pull the plug’!

Dicho hecho, segunda tanda ta bay aden y prome cu publico por manda e pastechi abou c’un slok, Team Snor ta pasa masacra Team Dos Playa cu score impresionante y inhumano di 21 – 7! Durante un entrevista c’un experto conoci den domino, cu pa motibonan di ya caba tin demasiado publicidad ta prefera di keda anonimo, esaki a declara cu simplemente den su humilde opinion, y nos ta quote e ad verbatim, “ … team Dos Playa no ta sirbi ni pa recicla.”