Sirbiendo comunidad pa mas cu 75 aña na Aruba, un biaha mas weekend pasa, Aruba Lions Club a sali pa sigui cu su projecto di “Smile Mobile” y a bishita e biaha aki Sint Michael Paviljoen y tambe San Pedro di Verona na playa cu ta e centro di cuido pa nos grandinan na nos hospital bieuw.
Ariba e diasabra aki tambe a instala un miembro mas di Aruba Leo Club cu ta Catherine Wernet cu pa algun tempo tawata mustrando su interes, pa forma parti di e muchanan cu ta hasi trabounan voluntario pa comunidad.
Un Pabien na e Leo Club y nan leadernan cu un miembro mas.
A sigui mes ora cu e trabounan di e dentadura di nos grandinan cu a haya un bon limpiesa y otronan cu mester a drecha y asina e dia a pasa y mientras esaki a tuma lugar e grandinan a wordo entreteni paden cu e musica di e leonnan y tambe cu e muchanan di Leo Club cu a percura pa e grandinan ricibi algo di smaak.
Cu e cooperacion di Bright Bakery, Universal Technologies Aruba, Price Smart, Friends of Lions cu a percura pa e algo di smaak, hunto cu tur e miembronan di Aruba Lions Club y Leo Club, a hasi sigur e projecto aki exitoso un biaha mas y tambe esnan responsabel pa esaki Lion Igor Croes y Lion Magaly Franken cu nan bon trabou formando parti di e comishon di “Smile Mobile”.

Pronto Aruba Lions Club lo lansa e projecto aki pa tur esnan den comunidad cu berdaderamente mester di esaki, por ricibi e servicio di nan dentadura y tambe otro typo di controlnan medico cu lo por bai wordo duna den un projecto di Aruba Lions Club.
Keda pendiente y Aruba Lions Club lo anuncia esaki pronto pa asina contribui un biaha mas na comunidad.