ORANJESTAD: Siman pasa Minister  di Enseñansa Endy Croes a presencia diescinco ceremonia di graduacion. Entre nan e ceremonia di graduacion di e studiantenan di EPI sector di ‘Hospitality & Tourism’ cu a finalisa nan estudio exitosamente y a ricibi nan diploma. Un total di 54 graduado cu ta representa un porcentahe di 54%.  Minister Endy Croes tabatin e honor pa dirigi palabra ne ocasion special aki pa felicita e graduadonan y a expresa di ta sumamente orguyoso pa mira nos hobennan finalisa nan estudio. Esaki ta e resultado: di boso esfuerso, deseo, disciplina, dedicacion y determinacion. Educacion ta e pilar, base firme y fuerte di nos bida y un nacion. Awe e graduado ta mira cu tur e esfuersonan a duna su fruto. Den e otro etapa di bida aki, algun lo bai traha y otronan lo sigui studia. E mandatario a sigui bisa: cu si mi por a duna boso un conseho probecha pa boso sigui siña y prepara bo mes pa mañan ta ciudadanonan exitoso cu por sigui hiba nos dushi pais pa dilanti. 

 

Pa finalisa e Mandatario ta gradici staf y personal, docente, mentornan y tur esnan cu a guia cada un studiante pa yega na a exito aki. Alabes  ta felicita e mayornan y famianan cu duna sosten. Danki pa kere den boso yiu y sostene nan den nan educacion. Masha pabien tur graduado, fiha  boso  meta, y bai p’e. Keda semper enfoca riba bo metanan, cu determinacion y fe bo ta logra. Enseñansa ta e yabi pa futuro.