Chaman Peruano cu a abusa di tres dama condena na 4 aña di prison

ORANJESTAD – Awe mainta Hues di Corte di Husticia, via video conference, a dicta sentencia den e caso penal cu Ministerio Publico a cuminsa contra e homber Chaman Peruano C.J.I. (42).

Por a compronde cu luna pasa Fiscal a exigi 5 aña di prison pa e Chaman Peruano. Hues awe mainta a haya C.J.I. culpable y a conden’e na menos castigo.

SENTENCIA

Hues a bisa cu e ta haya legalmente proba e acusacionnan:

— cu riba 22 November 2021, C.J.I. a viola e dama B.,

— cu entre 13 November 2019 y 26 November 2019, el a viola e dama E.

— cu riba 18 November 2021 a tacha honor di e dama C., door di mishi na su partinan intimo.

Hues a bisa cu durante tratamento di e caso, C.J.I. a desmenti di a viola dos dama y mishi na partinan intimo di un dama. Hues a sigui bisa cu C.J.I. a reconoce cu e tabatin relacion sexual cu e damanan B. y E. pero sin cu a forza nan. El a bisa cu e relacion sexual a sosode despues di e sessionnan di curacion y cu esaki tabata voluntariamente. E mishimento di e dama tambe tabata durante e session di curacion.

Hues a bisa cu e ta kere declaracion di e victimanan cu a denuncia cu C.J.I. a abusa di nan. Na opinion di Hues, e forma di traha di C.J.I. ta cu e ta hinca e damanan den un estado pisa di relahacion y a forza dos di tene relacion sexual y un a mishi na su partinan intimo.

Hues a bisa cu no tin indicacion cu e victimanan, manera C.J.I. ta bisa, cu nan lo a palabra pa haci acusacionnan inhusto contra C.J.I.. Hues a mustra cu ademas di declaracion di e victimanan, C.J.I. mes a bisa cu e tabatin relacion sexual cu e victimanan. Hues a bisa cu tur esakinan ta wordo usa como prueba.

Hues a mustra cu for di declaracion di e victimanan por compronde cu durante e sessionnan di curacion nan cara tabata wordo tapa y nan ta bay den un estado di relahacion hopi pisa. Diripiente nan ta haya nan confronta cu relacion sexual. Door cu nan tabata den un estado di relahacion pisa, nan no a resisti contra e relacion sexual.

Pa cu e castigo, Hues a bisa cu e ta tene cuenta cu C.J.I. como Chaman durante session di curacion a abusa di dos dama. Tambe el a mishi na partinan intimo di un dama.

Hues ta tuma C.J.I. na malo pa loke el a haci. E ta haya cu C.J.I. a abusa di e confianza cu e damanan tin den dje pa wordo cura.

Hues a condena C.J.I. na 4 aña di prison, kitando e tempo cu e ta sera den KIA.

Pa loke ta e demandanan di daño di e tres damanan, Hues a fiha pa e dama B., 5 mil florin y e resto di demanda el a declara no admisibel. El a bisa cu e dama lo por cuminsa un caso civil si e kier. Hues a honra e demanda di e dama E. cu en total ta 2800 florin y e dama C. 655 florin.