ORANJESTAD — Siman pasa tabata di bishita na Aruba, Consul General Mericano na Corsou, señora Margy Bond, cu a bin pa cera conoci cu Gobierno di Aruba. Consul Bond a wordo apunta recientemente y a haci su prome bishita naAruba y a cera conoci cu Minister President señora Evelyn Wever-Croes.

 

Prome Minister a remarca cu Merca ta e partner strategico mas importante pa Aruba tanto riba tereno di turismo, siguridad, cooperacion y comercio. P’esey un bon relacion entre Aruba y Merca ta hopi importante.

 

Durante e reunion a toca diferente tema manera e impacto di e crisis migratorio di Venezuela riba Aruba, tambe e tema di e sancionnan Mericano riba Venezuela. Banda di esey a toca e tema di e guera di Ukraine y e retonan cu tin pa cu e crecemento economico di pais Aruba awor despues di Covid y con Merca lo por yuda den esey. Temanan manera refineria, Custom Border Patrol (CBP) na aeropuerto tur ta temanan di importancia.

 

E reunion a bay den hopi bon ambiente y Consul Bond a reitera cu pa Merca e relacion cu gobierno di Aruba ta uno hopi importante.