ORANJESTAD – Diabierna Prome Minister Evelyn Wever – Croes tabata na DOW/ edificio di infrastructura, den cuadro di acto di condolencia cu a tuma luga pa ex trahado publico sr. Jossy Kock. Un persona hopi stima y cu a traha 30 aña na DOW sirbiendo interes general di Pais Aruba.

 

Prome Minister a haci uzo di e momento pa dirigi palabra na tur sernan keri di Jossy, famia, coleganan di departamento DOW, coleganan di henter e edificio di infra y di crisis team.

 

“Despues di scucha tur locual a wordo treci padilanti caba, mi mester bisa cu mi a traha cu Jossy casi 1 aña, y den e periodo aki mi a siña conoce un persona cu dedicacion enorme pa su trabou. Un persona cu durante su carera semper a desplega profesionalismo y conocemento. Un shon di hende cu ta busca solucion. Un hende cu ni maske ki circumstancia bin den su caminda, e ta tume cu tur trankilidad.”

Prome Minister a sigui bisa cu nunca el a mira Jossy rabia of bou tension, un persona cu su aporte cu el a duna tur e añanan na su departamento tabata hopi grandi.

 

 

Finalmente, Premier Wever – Croes a gradici famia pa a permiti Jossy duna parti di su bida profesional na Gobierno pa asina e por a sirbi interes general. “Ohala cu bunita recuerdonan di dje por yena boso curason. Y ora sinti su falta, mira portet y corda bunita tempo.”

Ta desea famianan, sernan kier, y coleganan di diferente departamento di Gobierno hopi forsa, y ohala e bunita recuerdonan por yuda pa surpasa e momento aki. Cu Jossy por sosega na Paz, Prome Minister a termina bisando.