ORANJESTAD – Desde bishita di Secretario di Estado Alexandra van Huffelen na Aruba, algo cu a hala hopi atencion ta e escogencia di regalo cu Prome Minister Evelyn Wever – Croes a haci. Particularmente cu a opta pa articulonan traha na Aruba door di localnan y cu tin un bunita storia tras di nan.

 

Awor cu nos ta den un etapa cu mas y mas ta dirigi e atencion y enfoke riba apertura di pais, normalidad y recuperacion economico, por wak bek na e resiliencia di nos pais cu tin hopi di haber cu nos hendenan.

 

Productonan di cuido marca Ha’bon

Naline Heilbron ta splica cu Ha’bon ta un compania di productonan traha na man na Aruba door di personanan cu limitacion. ‘Ha’bon Aruba, no ta produci unicamente habon. Como cu e demanda a cuminsa crece, e mercado tambe a crece y a cuminsa expande exitosamente den otro ramonan di cuido di cuero ‘skin care’,  a base natural cu ingredientenan natural.’

Algun di e productonan aki ta encera e liña di cuido di cara cu ta inclui ingredientenan manera colageno, elastina y hyaluronic acid, crema pa curpa, y un liña pa hende homber cu ta inclui after shave y cuido di barba. Ademas, sra. Heilbron a splica cu e cahitanan tambe ta wordo traha door di personanan cu limitacion.

 

Sjaal di Gigiola Gomez

Diseñadora local Gigiola Gomez tambe a expresa cu como Arubiano e ta orguyoso di a haya e oportunidad pa a traves di Prome Minister, scoge un regalo pa Secretario di Estado van Huffelen. ‘Arubianonan tin hopi talento y mester support esaki. Prome Minister sigur a haci un bon impresion.’

Sra. Gomez a sigui splica cu e inspiracion tras di sjaal escogi ta nos cultura. ‘Mi a wordo inspira como cu Aruba ta trece hopi hende cerca, diferente nacionalidad cu ta trece desaroyo pa nos pais. Mi ta kere nos hendenan ta nos personanan clave y mester sostene otro. Mi a inspira tambe no solamente pa hendenan, pero tambe e biento cu ta supla nos bandera nacional. E sjaal tin e print di colornan di nos bandera y e movimento di biento cu ta trece tur hende hunto.’

Sra. Gomez a keda hopi contento cu Prome Minister ta considera nos Arubianonan pa trece algo asina dilanti, pa intruduci hendenan internacional articulonan tipico, autentico y cu tin un storia di conta di nos cultura.  Tur Arubiano tincu uni y empodera otro pa nos por yega internacional. Pa esaki, colaboracion ta hopi importante’, sra. Gomez a expresa.

 

Gabinete Wever – Croes II Ta promove y sostene nos localnan cu a pesar di tempo dificil a desplega pasion, determinacion, perseverancia y creatividad. Esaki ta dos ehempel di companianan y personanan local, pero ta aplaudi cada un persona cu ta tuma e curashi pa lanta un negoshi y crea algo riba nan mes cu ta representa Aruba y nos cultura.