E parada a cuminsa cu un bunita desfile di nos Reinanan, Prins cu Pancho y nos Damanan Cultural cu a wordo bon escolta pa Roland Helder di Departamento di Cultura Aruba. E parada a conta cu participacion di 6 grupo cu animacion musical di seis banda y dos brassband. Por a admira varios carnavalista cu nan bunita bodypieces y headpieces, y tabata bunita pa mira sra. Riri Botta y su grupo cu nan roadpiece celebrando 45 aniversario di El Gaucho den e parada. Mester bisa cu tur esnan cu a participa den e parada of a para banda di caminda por a presencia e gozo, union y creatividad di Aruba su hendenan den e Parada Nacional di Luz aki. 

Minister Maduro ta gradici Presidente di Comision Celebracion Dianan Nacional, sr. John John Flemming, vocero di e parada sr. Lyonel Dirksz, tur boluntario y e team completo cu a asisti e mandatario pa den corto tempo prepara, coordina y guia e Parada Nacional di Luz na un manera exitoso. Masha danki na colega Minister Dangui Oduber cu semper ta cla pa sostene tur bunita incitiativa na bienestar di Pais Aruba. Na ATA, Setar y tur otro compania estatal y sponsernan cu a kere y a sostene e Parada Nacional di Luz cu nan aporte financiero, masha danki di curason. Minister Maduro ta gradici Cuerpo Policial, Servicio di Ambulance, Cruz Cora, Departamento di Obranan Publico y Serlimar pa nan cooperacion balioso na e Parada Nacional di Luz. Na prensa di Aruba y tambe di Corsou, Minister Maduro kier duna un palabra di danki pa informa y brinda cobertura na e bunita evento cultural aki di Aruba.

Minister Maduro kier gradici tambe cada participante pa nan bunita aporte na e Parada Nacional di Luz. Danki pa acepta e invitacion pa forma parti di un evento positivo. Na esnan cu a para na banda pa admira e parada, danki pa boso presencia, apoyo y comportacion ehemplar. Masha danki na tur persona y instancia cu a contribui na e exito di e Parada Nacional Luz. Ora cu bo haci algo cu bon intencion den bo curazon na bienestar di Aruba, bo ta logra semper.  Masha pabien Aruba!