Diamars 25 di januari, henter Aruba a celebra e fecha natalicio di señor Gilberto François ‘Betico’ Croes. Un fecha na unda cu nos ta para keto pa observa y reflexiona riba e bida, lucha, sacrificio y logronan di Betico y kico esaki ta nifica pa nos awo.

Dia di Betico a cuminsa cu un acto protocolar solemne y hopi significativo riba Plaza Betico. Debi na Covid, no tawata tin hopi invitado, sinembargo e tawata un acto hopi simpel y impresionante.

Apesar cu no tawata tin actividadnan cu nos pueblo ta costumbra riba dje rond di nos isla, hopi cas a hisa bandera y tawata tin bendemente di cuminda criyoyo manera semper. Y tambe varios programanan na television di Betico y su bida. Esakinan ta un indicacion cu Aruba a celebra e dia nacional aki na grandi.

Por a sinti un ambiente hopi positivo, di optimismo, un ambiente hopi alegre cu excepcion di algun weganan politico di oposicion cu riba un dia manera awe, no a haya ningun atencion di nos pueblo. Pasobra como un pais, esaki ta un dia pa nos uni. Y esaki por a nota tambe rond di Aruba, un union grandi den henter nos comunidad.

“Nos ta mira atras riba un bunita celebracion di Dia di Betico y ohala cu si bida, lucha y sacrificio por inspira nos den enfrenta tur e retonan cu nos tin cu enfrenta nos dilanti”, Prome Minister Evelyn Wever-Croes a expresa.