Diabierna merdia e homber Anderson Rasmijn, sospechoso di a tira mata John Anthony (Poentje) Castro, lo presenta dilanti Hues di Corte di Husticia di Aruba.
E asesinato di John Castro, q.e.p.d. riba 22 December 2010, a conmove henter comunidad. John (Poentje) Castro tabata un persona hopi conoci den comunidad. Especialmente cu su programa na Tele Aruba.
Por a compronde cu durante 10 aña, e famia di John Castro a keda den incertidumbre kico realmente a pasa cu nan ser keri.
A CUMINSA INVESTIGACION NOBO
Vocero di Ministerio Publico, dia 20 di April 2021 a informa Telenoticia cu un team di Cuerpo Policial di Aruba, riba peticion di Ministerio Publico, a traha riba un revision di e investigacion cu a tuma lugar na 2010. E revision aki ta carga e nomber “Apollo”.
E revision di e investigacion a hiba na puntonan di referencia concreto pa mas investigacion y esaki a pone cu Ministerio Publico a dicidi pa cuminsa un investigacion nobo.
PROMER SOSPECHOSO DETENI
Despues cu Ministerio Publico a publica pa hendenan yama e tiplijn 11141 y cu nan lo keda anonimo, e team a cuminsa haya informacionnan. A sigui algun luna di investigacion hermetico y dia 6 di September 2021, e homber G.M. a wordo deteni como sospechoso envolvi den e asesinato di John Castro.
DI DOS SOSPECHOSO DETENI
Algun dia despues, dia 9 September 2021, Ministerio Publico ta notifica cu a detene den e caso “Apollo” e di dos sospechoso, K.J.G.M.
Dia 14 di September 2021, Ministerio Publico a informa cu a laga e promer sospechoso G.M. liber pero e ta keda sospechoso.
Tres dia despues, 17 di September 2021, Ministerio Publico a informa cu Hues Comisario a prolonga e detencion di e sospechoso K.J.G.M.
A DETENE ESUN CU A TIRA MATA
Investigacion a sigui y a bin resulta cu e sospechoso cu a tira John Castro, Anderson Rasmijn, ta sera den KIA relaciona cu un caso di atraco.
Dia 9 September 2021 a detene Rasmijn como e sospechoso cu a tira John Castro riba 22 December 2010 mata.
Mayan merdia 2’or Rasmijn, acompaña pa abogado mr. Carlo, ta presenta dilanti Hues di Corte di Husticia. E ta wordo acusa di intencional y premedita riba 22 December 2010 a tira John Castro varios biaha den pecho y cabez cu consecuencia cu John Castro a fayece.Mayan merdia e caso lo ta pro forma y lo informa despues ki dia e caso lo tuma lugar.
