ORANJESTAD: Diamars ultimo den e Ballroom di Marriott Aruba Resort & Stellaris Casino a tuma luga e Conferencia 35 aña Status Aparte, Aruba ta di nos tur. E conferencia a conta cu presencia di Gobernador, Ministernan, Parlamentarionan, Presidente di Parlamento y diferente ex politico y personanan cu tabatin un rol importante den e 35 aña cu Aruba tin Status Aparte. Dia 1 di januari 2021 Aruba a cumpli 35 aña cu nos tin nos Status Aparte pero debi na e situacion di COVID-19 no tabata por e conmemora esaki na es momento.
Minister Endy Croes a expresa cu durante e conferencia a enfoca riba e lucha cu a conduci na e logro di Status Aparte, riba loke cu no a logra ainda y e futuro di Aruba. Un palabra pa tipifica e lucha cu a Aruba a hiba 35 aña pasa pa por a drenta den e fase nobo como pais autonomo tabata: union. Union den amor pa nos pais, y union den amor pa su simbolonan di identidad, nos himno, nos bandera, nos moneda y nos escudo. E lucha a wordo tipifica tambe pa determinacion y vision. Aruba a conoce lidernan grandi y visionario cu a hiba e lucha y despues a sa di desaroya nos pais den e Aruba cu awe nos ta biba aden.
Tabata un mainta di reflexion yena cu e emocion, historia di nos Pais y su protagonistanan. Un conferencia informativo y educativo cu un aspecto positivo, di union pa inspira tur hende cu Aruba a pasa den varios reto den pasado y a sobrepasa nan.Un mainta na unda e panelista cu tabata consisti di grandi y hoben a haya oportunidad di expresa nan opinion riba Aruba su Status Aparte. E conferencia a conta cu declamacion di poesia, baile, arte y a clausura cu e excelente interpretacion di e cancion ‘Mi Pais’ di nos artistanan local Jossy Brokke hunto cu Edjean Semeleer. Un bunita cancion pa recorda nos riba e stimacion cu nos mester tin den nos curason pa nos Pais.
Minister Endy Croes ta felicita y gradici e comision organisado pa un programa bon hinca den otro y unconferencia asina bunita dedica na nos dushi Pais Aruba.
