ORANJESTAD – Financial Action Task Force (FATF) ta un organisacion global cu tin un funcion pa controla actividadnan di labamento di placa y financiamento di terrorismo. FATF ta duna paisnan recomendacionnan con pa preveni y tambe identifica transaccionnan dudoso den e contexto aki. Aruba a ancra e recomendacionnan aki den su Ordenanza pa Preveni y Combati Labamento di placa y Financiamento di Terrorismo (LWTF). Na Aruba tin varios instancia cu tin un rol specifico den ehecucion di e ley aki, entre otro nos Financial Intelligence Unit Aruba (FIU Aruba, antes yama MOT) y Banco Central. 

FATF recientemete a emiti un declaracion pa informa y adverti paisnan cu e menaza di terorismo den diferente region, ainda ta grave. FATF cu hopi preocupacion a observa, un serie di atakenan terrorista recien na Afganistan y Irak. Esaki tambe tabata e caso riba e continente Africano y den e parti sur di e continente Asiatico.  EIIL (Daesh) y afiliadonan ta afirma cu ta atake terorista cu nan a orkestra. E atakenan aki a ocaciona morto of a herida centenares di civilnan inocente. Mientras tanto, Al Qaeda y otro organizacionnan terorista tambe ta sigui di ta un menaza pa stabilidad, seguridad y paz mundial.

Na nivel internacional, a tuma varios medida pa preveni cu organisacionnan terorista ta genera medionan financiero pa por planea y ehecuta atakenan. Sinembargo, ainda e gruponan aki por recauda y ricibi fondonan for di fuentenan legal y illegal. Regularmente institucionnan financiero y organisacionnan di supervision cu ta monitorea fluhonan di placa pa e gruponan aki, ta descubri metodonan nobo cu nan ta uza pa recauda fondo. Nan por manipula civil y empresanan, ta secuestra hende pa pidi pa placa, ta extorsiona rednan petrolero den e parti oost di Siria y posiblemente ta genera placa tambe mediante traficacion di hende. 

E riesgonan pa Aruba den e contexto aki no ta categorisa como halto, sinembargo FIU Aruba ta comparti e informacion aki cu e meta pa conscientisa tur instancia cu ta facilita transaccionnan financiero y pueblo en general pa ta semper alerto. FIU Aruba a yega di emeti articulonan cu ta duna informacion con nos ciudadanonan sa bira victima di ‘scams’. Maske cu ainda no tin suficiente evidencia cu for di Aruba tambe ta uza ‘scams’ pa recauda fondo pa organisacionnan terorista, no por descarta cu esaki lo por ta un metodo cu radicalistanan ta uza pa saca tiki placa cada biaha, for di un multitud di hende den diferente pais pa financia actonan terorista. FIU Aruba ta conseha comunidad pa ta alerta pa personanan (desconoci) cu via social media ta pidi pa mandanan placa, usando storianan of promesanan cu finalmente ta resulta di ta falso. E chens cu esaki por ta un ‘scam’ ta grandi. Hunto nos por preveni y combati financiamento di terorismo na un forma efectivo. 

Por lesa e declaracion di FATF riba website di FIU Aruba (https://www.fiu-aruba.com/news/).