ORANJESTAD, Aruba – 27 di November 2019: Un CAO cu pa e trahado di Hospital, LABHOH, Bloedbank y Respaldo ta inclui adelanto den nan sistema di pensioen y mas cu tur cos, un seguro special cu si nan bira malo y no por traha mas, cu nan lo sigui cobra un suma te ora nan yega edad di pensioen. Den e CAO aki a regla varios beneficio secundario pa e trahadonan. Separa di tur cos, na mita di luna di januari proximo, tur trahado ta ricibi un asina yama “signing bonus” di 150 florin.
Esaki tabata un momento hopi importante despues di un proceso di 20 luna largo, cu ayudo y sosten di Mediador di Gobierno, a logra firma un contracto colectivo di trabou (CAO) pa un periodo di 3 aña largo, cu ta aplicabel pa varios instancia den cuido.
A firma e CAO den presencia di Director di Cuido di Hospital, sr. Ezzard Cilié, Presidente di ABV, sra. Gina Maduro, Director di Respaldo, Dr. Van Gaalen y Mediador di Gobierno, Anselmo Pontilius. E CAO aki ta vigente pe añanan 2019 te cu 2021 y e tin hopi beneficio pa empleadonan di Hospital, LABHOH, Bloedbank y Fundacion Respaldo.
E protocol di 2019-2021 tin diferente punto cardinal p’e clase trahado, pues tur empleado a bay cu stapnan grandi dilanti. Algun beneficio ta:
- Pensioen; Semper e deseo tabata pa hisa e prima di pensioen tanto pa dunado di trabou como pa e trahado. Entrante 1 di Januari 2020 e dunado di trabou ta hisa su parti di 9% pa 9.25%. E clase trahado ta hisa di dje di 2.5% pa 4%. Pa 1 di Januari 2021 Hospital ta hise na 9.50%,y pa 1 di Januari 2022 esaki ta yega na 10% y esun di empleado ta yega 5%. Pues na 2022 ta alcansa un total di 15%.
- Kerstbonus cu tabata 780 florin lo aumenta e aña aki ainda na 900 florin. Na 2020 esaki lo bira 1000 florin y pa 2021 esaki ta bira 1100 florin (di cual 900 florin ta garantisa y 200 ta mara na prestacion);
- AO Verzekering: Na es momento aki ora un trahado tin tres aña AO y e wordo medisch afgekeurd e tin cu sigui e caminda pa pidi ontbinding. E trahado ta haya un afkoopregeling basa riba su añanan di trabao. Cu e AO-regeling e trahado por haya un uitkering te ora e yega edad di pensioen. Esaki ta un beneficio importante pasobra hopi compania no tin’e y specialmente den sector di cuido.
- Entrante 1 di januari e vrijstellingsregeling di traha warda (23.00-07.00) lo ser cancela. E trahadonan cu tin e areglo aki caba ta mantene esaki te cu cierto condicionnan. Trahadonan cu awor tin 60 aña bay ariba lo mantene vrijstelling van nachtdienst.
- “Signing bonus”di 150 florin lo wordo paga na tur empleado na januari 2020 mirando cu a tarda basta luna pa yega na un CAO nobo;
- Pa loke ta Indexering a bay di acuerdo pa sinta na mesa tocante e tema aki na 2020 na unda lo tene cuenta cu locual ambtenaren ta haya. Teniendo en cuenta espacion financiero.
No tabata facil pa a por a yega na e CAO na unda tur partido envolvi y mas improtante e empleadonan di tur e instancianan concerni por ta contento. Hunta di Directiva di Hospital a gradici Vakbond ABV pa e tremendo colaboracion y no por keda sin menciona e comision di negocacionan di Hospital y Respaldo cu a hasi un tremendo trabou.
