Awor cu mas Aruba mester di nan, gobierno NO ta yuda ni proteha criadornan di bestia ni tampoco agricultornan.
Diahuebs atardi nos redaccion tabata na cunuco di Auberto “Betto” Haayen unda cu un crimen a ser cometi na varios di su bestianan. Ta trata di como 15 bestia cu a ser venena di cual te na e atardi ey 11 a muri y tabata tin 3 mas cu ta mustra cu tabata muriendo y un otro mas cu lo bay fayece e dia despues. E bestianan aki ta basta caro y dificil pa trese nan Aruba. Ta increible con tin hende cu mentalidad criminal pa venena e tipo di bestianan cu ta percura pa un di e carninan mas sano cu tin pa e ser humano consumi.
Gobierno no ta yuda criadornan di bestia ni agricultornan
Esaki tambe ta un factor cu ta perjudica e criadornan di bestia y agricultornan, gobierno cu sa cu Aruba no tin ningun industria apart di turismo, tin hopi hende ta interesa den cria bestianan di cria y tambe agricultura pero gobierno no ta haci suficiente pa contribui ni empuja e 2 industrianan aki cual por yuda den empleo y ta un gran contribuyente pa baha e divisanan cu ta sali for di nos pais. Gobierno ta tarda pa otorga tereno pa criadornan di bestia y agricultornan. Gobierno ta cambia destinacionnan di terenonan fertil y cu a produci pa destinacionnan pa construi cas. Esakinan no por!
Gobierno no ta ofrese awa na prijs preferencial pa cultivadornan pero si na hotelnan. Si tin hopi des-empleo por cuminza prepara hendenan pa cultiva y designa tereno pa esakinan ymas proteccion pa criadornan di bestia.
Asina tin hopi mas punto cu mester atencion urgente pa crea e desaroyo economico local.
