LO FLEXIBILISA MEDIDANAN ENTRANTE DIALUNA 5 DI JULI

Aruba ta recuperando mas lihe cu a spera

Poco poco nos ta drenta den e normal nobo na unda cu nos mester keda cuida y keda alerta

Fin di siman a habri na unda cu Prome Minister di nos pais Evelyn Wever-Croes a anuncia flexibilisacion of eliminacion di medidanan pa loke ta trata Covid 19. Pa mas o menos 4 siman caba Aruba ta conoce stabilidad den casonan nobo y activo. Tin un averahe di mas o menos 3 caso nobo pa dia y bou di 30 caso activo pa dia. E grado di vacunacion ta yegando 69%. Pronto muchanan di 12 aña bay ariba tambe lo tin e oportunidad pa vacuna. Tur esaki, Prome Minister a duna di conoce, ta pone cu Aruba ta recuperando.

“Nos recuperacion ta bayendo mas lihe cu nos mes a kere cu e lo bay y esey ta pone cu awe nos por anuncia flexibilisacion di mayoria di e medidanan entrante dialuna awor. Poco poco nos ta mira cu nos ta bay bek na normalidad. E ta un normal nobo si caminda cu nos mester keda cuida y keda alerta. E virus tey anda apesar cu ta 3 caso nobo pa dia so tin pero e tey keto bay. E variantenan ta lanta cabes, algun mas preocupante cu otro pues nos mester sigui cuida y ta alerta”.

Prome Minister a enfatisa cu flexibilisacion di medidanan gobierno ta dal un paso mas atras den cuida abo y bo famia. Aworaki ta abo mester cuida bo mes y ta abo mester cuida bo famia. Medidanan cu a wordo flexibilisa ta lo siguiente:

Orario di ciere: Ta bek na normal.

Distanciamento: No tin exigencia mas di 1.5 meter di distancia.

Deporte: Restriccion ta wordo elimina: (Incl.Bush League).

Entiero: Caha habri. Si fayecimento ta di Covid, mester tin glas riba e caha.

Bingo: Ta permiti.

Establecimento: Restriccion ta wordo elimina: (Misa, Restaurant, etc).

Clubnan nocturno: Por habri bek.

Bailamento: Ta permiti.

Alcohol: Ta elimina prohibicion di alcohol riba caminda.

“Nos tin mas di un aña luchando hunto pa wak con nos lo combati e pandemia aki y su efectonan. Con nos lo convence un y tur pa tuma esaki na serio. Awe nos por mira bek riba un temporada hopi intenso cu hopi tension, hopi dolor pero como Aruba nos a uni. Esaki ta e forsa di nos union, e amor pa nos pais, e orguyo cu nos tin di ta Arubiano. Ohala cu nos laga esaki sigui guia nos den cada paso cu nos mester dal y den cada reto cu nos mester tuma”, Prome Minister Evelyn Wever-Croes a termina expresando.

Share:

Leave a Reply

Your email address will not be published. Required fields are marked *