Rotaract Club of Aruba a celebra su ‘Board Turnover 2021-2022’

Presidente Björn Vrolijk ta premira un club di boluntario hoben ‘considerabel, inclusivo y responsabel’

Oranjestad (AAN)  Fin di siman pasa, e club di hobennan boluntario Rotaract Club of Aruba a bisa ayo na ‘board year’ 2020-2021 y a anuncia su directiva nobo pa aña 2021-2022. Den su discurso, e recien Presidente Björn Vrolijk ta priminti un aña nobo caminda cu lo pone mas enfasis riba Liderazgo, Cultura, Colaboracion, Salud y Bienestar y Resolucion di conflicto, pa finalmente “stimula y empodera otro pa forma e Boluntario Feliz”.

Rotaract ta un organisacion internacional pa hobennan cu ta promove liderazgo, etica, y pas na mundo. Funda dia 1 di December na 1991, Rotaract Club of Aruba ta conta awe cu 30 miembro activo for di diferente parti di nos isla, cu ta cla pa crea un impacto positivo den nos comunidad. E aña aki, por cierto, e club lo celebra  30 aña di servicio pa  e comunidad di Aruba. 

Den sercania di famia e anochi aki, amistadnan, coachnan di club, Interactors y Rotarianonan, miembronan di Rotaract Club of Aruba, presidente saliente Tiana de l’Isle, a refleha ariba un aña diferente y cu su desafionan cu a encontra den club y tambe comunidad henter. Alabes, el’a recorda tur invitado presente di e resiliencia di e club, no obstante e situacion: A percura pa ehecuta y inova mayoria proyecto – adaptando na e circumstancianan – pa sigura continuidad di e club. 

Finalisando su discurso, e presidente saliente a conmemora cada proyecto y miembro cu a sobresali. Rebecca Maduro a wordo nombra como “Rotaractor of the Year 2020-2021” pa su esfuerso extraordinario. Club kier felicita Tiana de l’Isle pa su liderazgo y pa un aña exitoso. 

Den mesun rosea, club ta anuncia e Presidente nobo Björn Jean-pierre Vrolijk (29) pa aña 2021-2022. Como vice-presidente, Björn ya caba a mustra di tin e amor, capacidad y pasion pa guia e club ora cu e momento a exigi esaki.

E aña aki, su focus ta pa promove un club di boluntarionan hoben cu ta mas ‘Considerabel, Inclusivo y Responsabel’. Considerabel, teniendo cuenta cu e otro; Inclusivo, incluyendo tur miembro di comunidad; Responsabel, tur miembro tumando cuenta di nan accionnan. 

Presidente Björn Vrolijk ta orguyoso pa presenta demas miembronan di e hunta di directiva 2021-2022: 

Katinka van der Putten – Vice Presidente

Mary-joan Wardlaw – Secretaria 

Sunny Dodia – Tesorero

Jair Vesprey – Director di Relacionnan Publico 

Rebecca Maduro – Directora di ‘Community Service & Professional Development’ 

Roslaine Everon – Directora di ‘Club & International Service’

Tiana de l’Isle – Immediate Past President 

Un danki na tur cu a haci e anochi aki inolvidabel – specialmenteCas di Brenchie’s, Romar Trading, Elite Productions y Perfect Team Event Planners. Club kier a felicita y na mes momento desea Björn Vrolijk pasenshi, curashi y tur clase di exito pa cu e aña di directiva aki. 

Share:

Leave a Reply

Your email address will not be published.