Cosecha su actividadnan creativo den juni na San Nicolas

ORANJESTAD, ARUBA (14 di juni, 2021) – Cosecha tin pa e luna di juni workshopnan creativo plania na su localidad di San Nicolas. Tambe tin pakete di DIY (Do-It-Yourself) na benta pa esunan cu kier ta creativo na cas.

Diaheubs 24 di juni tin e siguiente workshop di mosaic di e artista local Merveline Geerman. Como parti di e serie di animalnan local, e biaha aki lo por traha e blenchi.

E workshop aki ta di 18.00 – 20.00. E prijs pa por participa ta AWG 50.00 y ta inclui material y bebida refrescante. Edad pa por participa ta 15 aña bai ariba.

Tambe e piesa di blenchi ta disponibel como pakete di DIY. E prijs di un pakete ta AWG 50.00. Delaster dia pa registra y paga pa esaki ta diaheubs 24 di juni y diabierna 2 di juli por buska e pakete na Cosecha Oranjestad.

Diasabra 27 di juni e artista Lorraine Evans tin un workshop na San Nicolas. E biaha aki Lorraine ta guia e participantenan durante un workshop di “Watercolor painting” y “Pencil Drawing”. Pa e workshop aki, lo pinta e anker cora di Sero Colorado mientras ta siña e diferente tecnicanan.  

E workshop aki ta di 14.00 – 16.00. E prijs pa por participa ta AWG 50.00 y ta inclui material y bebida refrescante. Edad pa por participa ta 14 aña bai ariba.

Recientemente Cosecha a introduci e paketenan di DIY di AruFlamingo. AruFlamingo ta conoci pa su piesanan di arte traha cu PVC. E linea di parha cu nan ta traha y tambe ta bende via e tiendanan di Cosecha ta inclui entre otro flamingo, barica geel, patrishi y mas parhanan local. Mirando cu AruFlamingo su mision ta pa duna aporte na proteccion di naturalesa y na educacion di esaki, nan a lansa un pakete di DIY unda por traha un cas di paharito cu e material di PVC y palo. Y riba e cas por pinta un diseño propio pa asina embeyece esaki.

E prijs pa e pakete aki ta AWG 50.00. Delaster dia pa registra y paga pa esaki ta diaheubs 24 di juni. Diabierna 2 di juli por buska e pakete na Cosecha Oranjestad. E pakete aki ta inclui tur material pa traha e cas di paharito, verf, kwashi y instruccion. Edad pa por participa ta 10 aña bai ariba, pero supervision di adulto ta necesario ora husa clabo y schroef pa traha e cas.

Pa mas informacion por tuma contacto cu Cosecha Oranjestad na telefoon 5878709. Tambe por manda un email na cosechaworkshop@gmail.com.

Pa por keda informa di Cosecha su workshopnan, artesanonan, artistanan y nan webshop nobo por bishita nan Facebook page: Aruba-Cosecha, Instagram page: cosecha_aruba y Webpage: www.arubacosecha.com.

Share:

Leave a Reply

Your email address will not be published.