Dialuna mainta a drenta informe di un accidente cu 4 auto envolvi y cu 5 hende herida y pega den auto riba e caminda di Tanki Flip pa Hato, mesora a dirigi tanto polis, ambulans como tambe e equipo di rescate di bombero na e sitio. Na yegada di e patruya a bin compronde mesora cu aki ta trata di 2 diferente accidente unda e prome ta trata di e dama chauffeur di e Nissan Sentra bayendo pabao a perde control bay dal semi frontal riba un Chevrolet Spark biniendo di pabao cu un dama na stuur cu 2 mucha den e auto. E impacto tabata asina fuerte cu a manda e Spark bay cay den e greppel pazuid di caminda. Ambos dama chauffeur a resulta herida como tambe e 2 muchanan den e Spark. E dama chauffeur di e Nissan Murano biniendo di pabao a wak e accidente su dilanti y a brake diripiente y esaki a logra para na tempo pero e Nissan Skyline su tras maneha tambe pa un dama no a logra para na tempo y a bay dal tras di e Murano. E dama chauffeur di e Skyline a resulta herida. Na yegada di e ambulans mesora a saca e muchanan levemente herida for di e Spark y a hibanan den e ambulans mientras na yegada di e otro ambulansnan a sigui brinda asistencia na e otro 3 damanan herida. Na yegada di e equipo di rescate nan a corta e porta di e Spark pa asina logra saca e victima for di e auto y pone den e ambulans. Ambulans a transporta tur e victimanan pa hospital.
