Cosecha su actividadnan creativo na San Nicolas y Playa

ORANJESTAD, ARUBA (08 di februari, 2021) – Desde Cosecha su localidad na San Nicolas a habri porta na 2016 a cuminsa ofrece tayernan creativo pa publico. E ambiente di San Nicolas unda tin arte riba caya pero tambe den e tienda di Cosecha mes ta complimenta e tayernan creativo. Desde awor e localidad na Oranjestad tambe ta bai fungi como centro creativo unda publico por bin hasi un tayer creativo of tuma les di arte. Riba e di dos piso di nos edificio monumental na Oranjestad nos lo bai ricibi publico pa hasi actividadnan creativo. 

Cosecha San Nicolas tin dos tayer den e luna di februari. 

E prome tayer ta tuma lugar diabierna 26 di februari. E luna aki e artista local Merveline Geerman ta introduci un linea nobo yama “Underwater creations”. Na comienso di 2019, Merveline a cuminsa cu su linea “Local animals” na Cosecha, unda publico por a traha piesanan di mosaic di diferente parhanan manera entre otro prikichi, bariga geel, shoco y di yuwana. E linea nobo di workshops ta bai ta enfoca riba e mundo bou di awa y lo husa diferente material manera tegels di vloer, tegel di glass, cralchi y mas. 

E prome piesa cu lo wordo traha ta bai ta un sirena. E workshop aki ta di 18.00 – 20.00 y e prijs pa por participa ta AWG 50.00 y ta inclui material y bebida refrescante. Edad pa por participa ta 10 aña bai ariba. 

Tambe e piesa di sirena ta disponibel como pakete di DIY. E prijs di un pakete ta AWG 50.00. Delaster dia pa registra y paga pa esaki ta diabierna 26 di februari y por buska bo pakete dia 5 di maart na Cosecha Oranjestad. 

Diasabra 27 di februari, e artista local Laureen Eman ta ofrece un workshop di paint pouring di nivel principiante. Den dos ora e participante ta siña tecnicanan di e disicplina di arte aki. Laureen ta un specialista di paint pouring y lo duna un introduccion amplio di con bo por traha bo mesun piesanan. Lo bai traha un canvas mediano y chikito. 

E workshop aki ta di 12.00 – 14.00 y e prijs pa por participa ta AWG 60.00 y ta inclui material y bebida refrescante. Edad pa por participa ta 15 aña bai ariba. 

E prome actividad creativo na Cosecha Oranjestad ta bai ta lesnan di pintamento riba diasabra.  

E artista local Erika Moran ta e prome cu conhuntamente cu Cosecha ta bai ofrece actividadnan creativo na Oranjestad. Riba diasabra 6, 13. 20 y 27 di maart di 10.00-12.00 lesnan di pintamento ta cuminsa y esakinan ta lesnan pa principiante. Den e lesnan di Erika e participante ta siña tecnicanan basico di pintura husando diferente material manera pintura di acrylic, awa y azeta. Erika ta un artista cu tin educacion den arte y ta con0ci pa su pinturanan cu un explosion di color riba nan. 

E prijs pa por participa ta AWG 150.00 y ta inclui material y bebida refrescante. Edad pa por participa ta 10 aña bai ariba. 

Ta importante pa sa cu durante e actividadnan creativonan na San Nicolas y Oranjestad tur precuacion di higiena y seguridad lo wordo tuma en conexion cu Covid-19. 

Pa mas informacion por tuma contacto cu Cosecha Oranjestad na telefoon 5878709. Tambe por manda un email na cosechaworkshop@gmail.com

Pa por keda informa di Cosecha su workshopnan, artesanonan, artistanan y nan webshop nobo por bishita nan Facebook page: Aruba-Cosecha Instagram page: cosecha_aruba y Webpage: www.arubacosecha.com.

Share:

Leave a Reply

Your email address will not be published. Required fields are marked *