“MIEMBRONAN DI ARUBA ONE HAPPY ISLAND LIONS CLUB A REPARTI APPELSINA Y INFORMACION NA AUTOMOBILISTANAN”

Campaña di Prevencion y Concientizacion riba Dia Mundial di Diabetes 14 di november tabata exitoso

ORANJESTAD – Relaciona cu Dia Mundial di Diabetes 14 di November ultimo e famia di Aruba One Happy Island Lions Club tabata na e rotonde na Watty Vos Boulevard/Ponton pa reparti saco cu appelsina cu mensahe positivo pa comunidad hiba un bida mas saludabel. Ademas a reparti foyeto cu informacion di posibel sintomanan di diabetes na automobilistanan. Mirando e situacion actual e Leonnan contento y den un forma responsabel cu nan tapaboca bisti y tumando e precaucion necesario a haci e bunita accion aki.

E meta di e accion di diasabra tabata pa riba e Dia Mundial di Diabetes 2020 concientiza nos comunidad riba e malesa di Diabetes y su riesgonan,  promove nos comunidad pa hiba un bon alimentacion y bida fisico activo.

Algun di e mensahenan di concientizacion tabata lo siguiente:

“Salud ta igual cu bon alimentacion”

“Mi ta alimenta saludabel, mi ta bida”.

“Awe mi ta duna mi sernan keri fruta y berdura”

“Mi ta stima mi mes y mi ta alimenta saludabel”

“Loke bo sembra awe, bo ta cosecha mayan”

“Cuida bo curpa, e ta bo unico luga di biba”

“Accionnan simpel por reduci e riesgo”

“Awe mi ta stima mi mes suficiente pa haci actividad fisico”

Aruba One Happy Island Lions Club ta mira riba un accion publico hopi exitoso cual a wordo hopi bon ricibi y e reaccion den comunidad tabata hopi grandi y positivo. Hopi ta esnan cu a saca un potret pa asina demostra nan apoyo na e campaña aki di Aruba OHIL Club. Un danki na comunidad pa e apoyo ricibi y esaki sigur ta motiva nos organisacion pa sigui eherce trabao di servicio na bienestar di nos comunidad y muy especial na esnan cu ta mas den necesidad. Nos meta ta pa nos Aruba ta un comunidad mas saludabel.

Share:

Leave a Reply

Your email address will not be published. Required fields are marked *