Diadomingo atardi a drenta informe di un boto a pasa riba un hende na Boca Catalina, mesora a dirigi tanto polis como ambulans na e sitio. Na yegada di e patruya na Boca Catalina nan no a mira nada den e area y ningun hende no a bisa nan nada. Despues di un rato a drenta un otro informe di cu e boto ta treciendo e victima na Fisherman’s Hut pa ambulans yega mas facil y cerca. Na yegada eynan a compronde cu e victima ta seriamente herida dor di e chapaleta di e motor di boto y a pidi e ambulans cu mas urgencia. Mesora despues e ambulans a presenta y a atende e victima y a pone den e ambulans, e ora ey numa a bin haya sa cu no ta trata di un pero dos victima y a pidi un otro ambulans pa e otro victima. Mientras e prome ambulans a bay cu urgencia cu e prome victima rumbo hospital. Informacion obteni e momento eynan a bin sali na cla cu victimanan tabata duik unda e botonan ta para y ora nan a subi bini na e superficie e chapaleta a corta ambos victima femenino. Na yegada di e dos ambulans nan a atende e victima y a bay cun’e tambe pa hospital.
