E anuncio por medio di un conferencia di prensa di sr. Thijsen, presidente di Parlamento, cu el a tuma e decision cu ta hala aden e mocionnan, incluso esun di desconfiansa contra ex-minister Lopez-Tromp, riba su mes ta trece mas duda den e forma di proceder anti-democratico di e presidente. Atrobe sr. Thijsen ta tuma un decision pa Parlamento pa anula e mocionnan, segun su persona pa evita cu e “rechtszekerheid” di Parlamento no wordo afecta dor di e discusionnan.
Pero atrobe sr. Thijzen ta bolbe actua robez. Ta bolbe actua inconsticionalmente. Pasobra sin cu el a consulta cu Parlamento riba e procedura robez hiba dia 15 di oktober, e ta bin bisa cu e procedura tabata robez. Esaki nifica tambe cu e votacion tabata robez. Y tambe e ta sigui e procedura robez di informa gobierno di un mocion, cu e sa masha bon cu eta ILEGAL.
Esaki ta hiba cu Presidente di Parlamento hunto cu mas miembronan di e fraccion di MEP a comete corupcion administrativo y kibra cu normanan constitucional y democratico di nos pais. Si Presidente di Parlamento kier coregi e situacion cu el a permiti wordo crea, UPP ta kere cu:
1. E mester yama un reunion publico unda cu e ta responsabilisa su mes na Parlamento PROME y no na prensa pa su proceder, cu e consecuencia cu Parlamento por dicidi di bahe como presidente di Parlamento;
2. E mayoria den Parlamento mester dicidi kico ta e next step cu nan lo tuma y asina declara full e reunion nr. 7 aki, nulo y pone un agenda nobo cu ta trata “opzegging vertrouwen” den e minister y den presencia di minimal 11 miembro laga un votacion tuma lugar;
3. E presidente di Parlamento mester tuma honor na su mes y por lo menos tuma retiro como Presidente di Parlamento, y kizas hasta tuma retiro completo for di Parlamento.
4. Alabes Parlamento mester haci un investigacion profundo pa determina e culpabilidad di sigur 2 parlamentario cu segun e imagennan tabata sa cu sr. Howell no tabata presente na momento di e votacion. Aki UPP ta referi na sr. Rocco Tjon y sr. Hendrik Tevreden.
Alabes e Minister Presidente di Aruba cu a apoya e actonan fraudulente y corupto aki ciegamente.
Despues di e rueda di prensa di Presidente di Parlamento, UPP ta kere cu no solamente henter Parlamento, pero tambe gobierno a wordo hinca den un skina. Nos Staatsregeling den articulo II.2.1 ta bisa cu ta den consulta cu Parlamento ta pone y kita Minister-President y demas Ministronan. Esaki “na overleg” cu Parlamento. Den II.2.2 ta wordo bisa cu na momento cu un Minister no tin confiansa mas di Parlamento e tin di pone su “ambt” na disposicion di Parlamento. A prima vista kizas e forma cu a wordo escohi ta parce uno constitucionalmente corecto, ora cu gobierno a manda bisa Gobernador cu tin un “onwerkbare situatie”. Cu e “eenheid” di gobierno ta wordo menasa cu presencia di e Minister. Gobernador na su turno a pidi e “gevoelens” di Parlamento y esaki NO ta “na overleg”!
Loke nos ta cuestiona ta cu presidente di Parlamento tambe no a actua corecto dor di no a yama un Reunion Publico di Parlamento, sino mas bien un Comision Central. Na su turno e pregunta ta si Gobernador a actua corecto di bay di acuerdo cu e proceder aki y ta bay over na firma e decreto di retiro di sra. Lopez-Tromp. Lo tin un “blessing” aki di Hulanda pa actua como tal? E forma cu a wordo usa pa core cu e Minister, ta exigi pa Parlamento duna un opinion CLA y RASPA, di acuerdo cu e articulonan menciona, pues den un Reunion Publico. Pero esaki no a sosode na nos aparecer.
Esaki por duna e ex-minister caminda di cana huridacemente si Parlamento no actua y yama un Reunion Publico urgente pa coregi e situacion, esta pa “trek in” e mocionnan ilegal y na mes momento pone un votamento di nobo unda por lo menos 11 miembro mester ta presenta y pa,colmo ta obvio cu sr. Alan Howell NO tabata presente den Parlamento pero su nomber ta aparece riba e lista cu un “kruisje” cu elo a vota toch. Esaki ta simpelmente fraude y corupcion. Y esaki ta inaceptabel!!
Si esaki no sosode, e ex-minister kizas por hasta acudi na Huez, teniendo na cuenta cu contrario na e Constitucion Hulandes e “opzet en inhoud van de Staatsregeling” di Aruba ta duna huez un espacio pa den un forma limita haci un “constitutionele toetsing” na momento cu nos kere cu malpractica a wordo cometi y cu ta mina nos “rechtsorde”!
Contrario na Presidente di Parlamento, nos di UPP ta kere cu ainda henter e asunto aki di dia 15 di oktober no ta tras di lomba. Y pa bienestar di nos Constitucion y nos Democracia, mester percura pa tipo di casonan asina no pasa mas.
Nos no por permiti cu ni e Presidente ni tur otro invulcra por “get away for crime” dor un acto contra nos leynan atrobe di e Presidente di Parlamento!! Nos a bisa caba cu presidente di Parlamento mester a tuma honor y tuma su retiro pa loke a tuma lugar. Apesar cu e tempo di ex-parlamentario Sue-Ann Ras nos a haya su decision hopi drastico, despues di a pidi dispensa, di tene honor na su mes y tuma retiro, awe nos ta wak un presidente di Parlamento cu parce di no sa kico ta honor y ta pidi tur hende keda keto y continua den su funcion manera nada no a pasa. Un diferencia di nochi y dia den e dos personanan aki.
Partido UPP
Booshi Wever
30 oktober 2020
