Premier Evelyn Wever-Croes: GOBIERNO TA PROLONGA SUBSIDIO DI SALARIO Y FASE CU TRES LUNA MAS

Asistencia na companianan mediano y chikito tambe ta wordo prolonga

Den un discurso nacional diadomingo anochi, Premier Evelyn Wever-Croes a trece trankilidad y duna perspectiva. Durante e discurso Premier a anuncia cu Gobierno di Aruba ta prolonga subsidio di salario, FASE y e asistencia na companianan mediano y chikito.

Premier Wever-Croes a splica cu Gobierno di Aruba ta sigui den negosacion cu Hulanda pa por yega na financiamento di e fondonan cu Aruba tin mester awor pa por surpasa e crisis y pa cuminsa reconstrui nos pais. “Nos no ta di acuerdo cu otro tur ora, pero e negosacionnan ta bayendo bon, den ambiente di respet”, tabata palabranan Premier Wever-Croes.

Mientras tanto Gobierno di Aruba a logra financia 170 miyon florin localmente a traves di e bononan cu a wordo emiti. Premier a gradici tur esnan cu a cumpra e bononan, pasobra por a nota cu e interes bou di nos localnan ta grandi pa e bononan, y esaki ta di aprecia.

“Esaki ta duna nos e espacio financiero pa por cumpli cu e debernan di Gobierno pa por garantisa entre otro cuido medico, siguridad, enseñansa”.

“Y awe mi por anuncia cu Gobierno ta prolonga FASE, subsidio di salario y e asistencia financiero na empresanan mediano y chikito. E facilidadnan aki na sector priva, ta wordo prolonga cu 3 luna, te cu december. Pues esnan cu ta depende di FASE y di subsidio di salario por ta trankil, pasobra esakinan ta wordo prolonga te fin di aña. Mescos ta conta pa e sosten di 4000 florin pa cuartal pa empresanan mediano y chikito. Danki na e colaboracion di Minister di Finansas y Minister di Asuntonan Social, nos ta logra trece trankilidad den comunidad pa e lunanan nos dilanti, mientras nos ta traha pa nos economia pick up bek”.

Premier a garantisa cada ciudadano di pais Aruba cu su coleganan minister y e, lo sigui lucha pa trece siguridad y trankilidad bek, y lo no descansa, te ora Aruba sali di e crisis aki.

Premier na final a pidi pa nos ta mas tolerante cu otro y caminda cu mester, ban duna otro un man. Y maske por diferencia di opinion riba algun asunto, pa ban para hunto pa hiba nos pais padilanti.

“E pais aki ta di NOS, di NOS tur, y ta nos tur mester hiba e pais aki padilanti. Ban pone nos diferencianan un banda y desde awor nos agenda ta uno so: PROGRESO DI ARUBA”, Premier Evelyn Wever-Croes a expresa.

Share:

Leave a Reply

Your email address will not be published. Required fields are marked *