Booshi Wever: LEY PA UN Y NO PA OTRO, SI KEDA TOLERA Y ACEPTA NOMBRACIONNAN “HANDPICKED”

Reciente UPP a mustra riba un nombracion cu NO a bay segun procedura, esta esun di e Korpschef.  Den un Estado di Derecho nos conoce varios funcionnan cu ta ser considera “vertrouwensfunkties”. E posicion di Korpschef sigur sigur ta cay bou di e categoria aki. Tin reglanan estricto cu mester sigui pa nan nombracion, di cual e Ley di Veiligheidsdienst Aruba, articulonan 15 y 16, hunto cu e Decreto di 2006 relaciona cu “vertrouwenfuncties” ta prescribi ta importante. Mirando cu e gobierno ta “lap” e reglanan “aan hun laars” den e forma di proceder, pregunta ta si a tene cuenta cu loke ley ta prescribi den e caso di e funcion aki. 

E mesun forma di proceder di e gobierno anterior, cu e integrantenan di e gobierno actual a cuestiona fuertemente den pasado, ta sigui wordo usa. Sin ningun tipo di control di parti di un “Stempelparlement”, departamentonan y/o servicionan a wordo lanta djis pa pone directornan “handpicked” pa dirigi esakinan. Lamentablemente ni e buro Integridad ni e Ombudsman ta den funcion pa duna e pueblo e oportunidad di entrega kehonan contra e tipo di politica di patronahe cu ta un di e causa di nos desaster financiero. 

Decisionnan descabeya semper lo tin su repercusion. Na prome lugar ainda gobierno ta wordo confronta cu gastonan pa motibo di personanan cu ta aparece den e “overtolligheidspool”. Ambtenaar cu pa motibo politico a wordo hala un banda pa faborece fanaticonan di e partido na mando. Sin conta e “partidarionan” cu ta wordo poni riba payroll pa cana rond di ministernan, pero cu no tin ningun tipo di productividad.

Na di dos lugar e consequencia financiero. Esaki a bira bisto den e caso di e nombracion ultimo di e Korpschef. Mester a busca unda ta acomoda e ex-Korpschef, cu por cierto tambe tabata “handpicked”. A crea un departamento/servicio nobo cu lo bay tin su infrastructura cu lo bay tin costonan extra tambe. Pa colmo den un crisis sin precedente! 

Por ultimo e nombracion a crea un precedente cu lo por tin consecuencia directo pa funcionamento di e departamento. E Korpschef nobo lo por perde e autoridad moral pa actua contra cierto ambtenaarnan cu a peca cu nan trabou. Con tanto e Korpschef nobo como e Minister  concerni lo bay actua contra agentenan policial cu comete un infraccion? 

UPP a haya informacion cu tin 5 miembronan di e Cuerpo Policial na cas cu pago, en espera di un castigo diciplinario of hasta retiro, pa motibo cu nan lo a saca informacionnan confidencial for di e cuerpo. Nan lo haya e mesun trato cu e ex-Korpschef,cu tambe a saca informacion, y a wordo premia como LIASSON OFICER enbes di wordo kita “op staande voet”? Cu ki autoridad moral e Korpschef lo bay firma e conseho pa minister respecto e sancion? Acaso e ta bira LIASSON di un ex-minister?

Cu e acto iresponsabel aki e minister a mina e fundeshi di Cuerpo Policial!!

Ta kico e Gobernador ta bay haci den e caso aki? Elo colabora cu tipo di maniobranan?

Ta obvio cu nos no por spera mucho di supuesto REFORMANAN ni CAMBIONAN fundamental den e forma di goberna nos pais di un gabinete politico aki. Mester bin un gabinete no-politico transistorio pa introduci reglanan estricto di Good Governance via un Dialogo Nacional pa asina ey, bay den un Cumbre di Reino pa convence Hulanda cu nos ta serio y di berdad nos kier ta MERECEDOR di nos Status Aparte. Un Status Aparte cu a wordo logra dor cu e derecho inalienabel di autodeterminacion di e Pueblo Arubano a wordo reconoci. Esaki ta e unico forma cu nos por logra e CONFIANsA pa nos haya e ayudo financiero, pero tambe e ayudo pa nos crea un situacion na unda Aruba lo haya e posicion atrobe den Reino na unda e relacion lo bira uno di respet y di igualdad. Ta p’esey UPP ta vocifera hopi tempo caba cu nos no kier ni un mochi di pisca mas pero bin yuda nos unda nos mes lo pisca nos piscanan.

Partido UPP

Booshi Wever

1 oktober 2020

Share:

Leave a Reply

Your email address will not be published. Required fields are marked *