Oranjestad- 22 di september 2020- E situacion actual di COVID-19 ta pone preshon financiero ariba hopi instancia cu ta depende ariba donacion y of subsidio pa por sigui duna servicio. Esaki ta conta tambe pa Stichting Ambiente Feliz cu ta depende ariba subsidio pa por opera diariamente y sirbi e binti (20) habitantenan na e centro di cuido.
Aruba Bank a haci un donacion na e instituto pa salvaguardia e necesidad basico pa e habitantenan, entre otro comestibel y productonan di higiene y cuido personal pa e habitantenan.
Fundacion Ambiente Feliz a wordo funda 31 aña pasa den e aña 1986 door di Zuster Philothé Simons. Zuster Simons y algun otro zuster a encarga nan mes cu persona cu limitacion mental den communidad di Aruba.
Debi na un necesidad grandi pa un cas di cuido, Zuster Simons a logra na aña 1986 pa habri un cas na Santa Cruz 75 na unda na prome instante a ofrece 12 cliente un lugar pa biba bou di e nomber “Stichting Gezinsvervangend Tehuis”.
Desde november 1997 e nomber a cambia pa Stichting Ambiente Feliz. Durante e añanan e cantidad di cliente a aumenta y e cas original a wordo expandi pa asina crea mas lugar.
Den cuadro di nos responsabilidad corporativo social, nos ta orguyoso di por contribui na un bunita causa manera esaki. Pa duna un man na Stichting Ambiente Feliz pa tuma contacto cu nan na 5858738 of por manda un mail na: ambientefeliz@setarnet.aw.
