Autor di buki pa mucha, sra. Noris van Lis-Donata, a bishita biblioteca pa entrega 4 ehemplar di su ultimo publicacion titula ‘Mi Gran Amigo’. Esaki ta un buki pa mucha den categoria di edad di 8 pa 12 aña y ta skirbi na dos idioma, Papiamento y Hulandes. Ilustracionnan ta di e conocido ilustrador local, Vanessa Paulina. Vanessa a ilustra diferente buki di mucha den su carera. Esaki ta sra. Noris van Lis-Donata su di dos buki pa mucha. E prome tabata ‘Ban bisa danki!’.
Den ‘Mi Gran Amigo’muchanan ta cera conoci cu Hesus pa medio di e storia di un burico cu yama Pax. Pax ta experencia aventura, alegria, orguyo y tambe decepcion y tristeza. Pero al final Pax ta siña e balor pa carga Hesus den su curason. Esun cu semper tey 24/7 pa scucha bo.
Sra. Noris van Lis-Donata ta hurista pensiona y ainda activo den comunidad y den Quota International club of Aruba. Noris a keda decora como ‘Lid in de Orde van Oranje-Nassau’ na 2019. Durante e periodo di su trabou den comunidad Noris a nota cu ta hopi importante pa hende desde chikito crece cu norma y balor.Asina a cuminsa crece e idea cerca Noris pa trece algun mensahe practico tocante e existencia di nos Creador den forma di un buki pa muchanan.
‘Mi Gran Amigo’ lo ta parti di e coleccion di biblioteca hubenil pronto y ta obtenibel pa cumpra na libreria. ISBN 978-99904-69-47-9
