MetaCorp ta sigui inverti: Reapertura di The Movies@Punda na Corsou cu tecnologia IMAX

ORANJESTAD, Aruba – 1 di September 2020: E envolvimento y participacion di MetaCorp den e industria di cine na nos hermana isla Corsou ta data for di hopi aña pasa caba. Y mescos cu na Aruba, ey tambe ta sigui innova, inverti y desaroya. Siman pasa a tuma luga reapertura di The Movies@Punda.Despues di un inversion miyonario, e compania a percura pa renoba henter e compleho di cine, cu a inclui un area di cuminda y bebida nobo, mueblenan nobo den e salanan y riba dje a combina dos sala den un solo sala di IMAX.

MetaCorp ta maneha dos centro di cine “The Movies” na Corsou, un den Punda y e otro na Otrabanda. Hunto nan tin 11 sala di pelicula. Na Punda a renoba henter e compleho y a inclui awo un sala super moderno uzando e miho tecnologia na mundo, IMAX, cu 160 stoel comodo y moderno pa sinta aden.

IMAX ta nifica Image Maximum y cu e tecnologia moderno aki, e amante di pelicula lo sinti comosifuera cu nan ta grabando e pelicula su dilanti, proyecta via un sistema di laser cu ta percura pa ilumina henter e pantaya. E tecnologia laser ta hopi mas miho cu locual ta custuma cu ne, pasobra e ta enfoca riba tur detaye. Un pantaya pa IMAX di mes ta mas grandi cu tur otro y e zonido ta 12.1 cu diesdos speaker tur rond di e sala y un adicional pa garantisa “base” for di tras di e pantaya.

Ta bon pa accentua cu The Movies na Aruba y Corsou tin e derecho exclusivo pa tin un sala di pelicula IMAX riba e dos islanan. Ta trata aki di un sistema di peliculanan graba cu resolucion halto, cu teatronan cu proyector y pantaya mas grandi cu normal y cu pelicula cu ta pasa horizontal bo dilanti. Un di e condicionnan den un sala IMAX ta e modelo di stadion, pa ningun cliente no stroba e bista di otro.

Pa loke ta Aruba, ey e trabounan ta avansando rapido, aunke for di schedule debi na e pandemia. Ta depende di varios compania di afo cu mester a bin pa instala ekipo- y mueblenan nobo pa e teatro. E diferencia entre Corsou y Aruba ta cu na nos hermana isla a combina dos sala den un solo IMAX na Punda mientras cu aki na Aruba a construi henter un compleho di entretenimento nobo, cu 10 sala, cu un sala IMAX, un piso completo di restaurant y espacio pa muchanan por hunga. Den e siguiente simannan lo finalisa e proyecto aki, situa riba Sasakiweg.

MetaCorp e aña aki ta celebra 100 aña di existencia. Den esey a enfoca hopi riba inicio di nan negoshi, esta cine, cu a start na aña 1920. Como tal, a percura pa renoba teatronan existente, manera esun na The Movies@Marketplace, a introduci IMAX den e completo completamente renoba di The Movies@Punda na Corsou, a renoba y añadi dos sala VIP na The Movies@Otrabanda, a renoba y habri The Movies@Principal na San Nicolas, a construi di nobo y habri The Movies@Drive In y awo ta casi cla cu e proyecto grandi di The Movies@Gloria riba Sasakiweg cu e tecnologia IMAX. 

Share:

Leave a Reply

Your email address will not be published. Required fields are marked *