DANKI NA VISION DI PREMIER EVELYN WEVER-CROES DESDE 2018 ARUBA TIN UN FONDO DI CRISIS CU 1,9 MIYON FLORIN

Na aña 2018, momento cu Premier Evelyn Wever-Croes mester a presenta e prome presupuesto di su Gabinete, riba conseho di sr. Rino Hermans hefe na Bureau Rampen Bestrijding Aruba, a institui un fondo di crisis, Crisis Paraatheidsfonds, cu 1.9 miyon florin.

Parlamento di Aruba a aproba e peticion di Premier Evelyn Wever-Croes. Premier Wever-Croes a splica e tempo ey cu ta iresponsabel pa Aruba no tin un fondo di crisis. E fondo aki ta haci posibel cu por reacciona mesora na momento di un crisis. Prome cu Covid, Aruba no a conoce crisisnan di e magnitud aki pa hopi tempo.

Ta danki na e fondo aki, e Crisis Team por a actua lihe asina cu Covid a bira pandemia. Aruba a cuminsa prepara pa un epidemia desde comienso di aña, pero momento cu Covid a bira pandemia, a exigi un ahuste di e maneho. Danki na e fondonan disponible, Aruba por a percura cu tabata tin suficiente test disponible na Aruba, Aruba por a aumenta su capacidad di cuido intensivo y por a atende cu tur e retonan di e crisis.

Den Parlamento siman pasa hefe di Bureau Rampen Bestrijding Aruba a elabora riba esaki y a splica Parlamentarionan con e structura di un crisis ta hinca den otro. Tin varios Parlamentario cu no tabata sa cu entre otro momento cu tin un crisis, ta e Minister Presidente di un pais tin e “opperbevel” y ta responsabel pa tur loke ta trata e crisis, tambe entre otro pa enseñansa. Tambe a splica cu e maneho di crisis team ta wordo evalua cada 3 dia y ta wordo publica den un decreto ministerial.

Desde comienso di e crisis aki a publica mas di 50 decreto ministerial caba. E autoridad aki ta basa riba e Ley di Calamidad. Aruba ta un di e paisnan miho prepara den Caribe, cual ta e motibo cu nos por atende cu e crisis aki.

Den Parlamento a bin dilanti cu Aruba ta prepara y tin suficiente test, suficiente ekipo y tin suficiente personal pa atende cu e crisis. Pero locual ta preocupante ta e comportacion di hendenan. P’esey mester a tuma medidanan adicional pa frena e plamamento di e virus. Mester remarca cu Parlamento a keda hopi satisfecho cu e informacionnan cu a wordo comparti.

Share:

Leave a Reply

Your email address will not be published. Required fields are marked *