Conta mi bo storia

Fundacion CINEARUBA ta presenta un exposicion di obra di man y otro produccion di muchanan di scol titula ‘Conta mi bo storia’. Esaki ta e resultado di e prome aña di su proyecto ‘Kids Report’. E exposicion ta na Biblioteca Nacional Aruba y ta habri den dia. 

Kids Report ta un proyecto pa mucha di scol cu ta enfoca riba educacion di arte y cultura. E ta un proyecto cu un duracion di tres aña. Durante su prome aña alumnonan di cuater scol basico a ricibi diferente tayernan entre otro tayer di pinta, ilustracion, musica, zonido/naracion y fotografia. E tema principal di cada tayer tabata contamento di storia unda cu pa medio di diferente disciplina di arte e alumnonan a crea nan propio storianan.

E scolnan cu ta participa na e proyecto aki ta Prinses Amalia Basisschool, Pius X school, Sint Franciscus College y Colegio Santa Famia. E proyecto ta forma parti di e curriculum di e scolnan y e tayernan ta wordo duna durante orario di scol. Por mira obranan realisa pa cada alumno di tur 4 scol. E alumnonan a ricibi guia for di 2 instructor; Adriano Fernandes cu a duna tayer di musica y con pa conta storia cu zonido/naracion y Steffen Maas cu a duna tayernan di pinta y ilustracion.

E proyecto lo sigui cu e mes un alumnonan den di cinco y di seis klas. E presentacion final lo consisti di diferente mini-documentario tocante cultura, arte y deporte realisa pa e propio alumnonan. E proyecto ‘Kids Report’ ta posibel danki na e apoyo di Fonds voor Cultuurparticipatie, Unoca, Prins Bernhard Cultuurfonds Caribisch Gebied, Cede Aruba, WEB Aruba N.V., VNO, DCA, Aruba ABC, Biblioteca Nacional Aruba y tur e scolnan cu ta participando.

Por bishita e exposicion te cu diabierna dia 4 di september na biblioteca na Playa. Mayornan ta compaña na yiu pa e bishita.

Share:

Leave a Reply

Your email address will not be published. Required fields are marked *