ABC Tours galadorna como #1 di e Top Experiences den Caribe

ORANJESTAD, Aruba 2 di Augustus 2020:  Manera tur aña, TripAdvisor pa medio di e “Travelers Choice Awards”, a reconoce recientemente e top experiencianan mas busca como tambe e reservacionnan mas gusta globalmente. 

            E ganadornan ta wordo determina a traves di un algoritmo cu ta tuma den consideracion tur e ‘business reviews’, opinionnan y popularidad entre e bishitantenan den e ultimo aña. 

            E aña aki, un biaha mas e compania local  ABC Tours, a haya reconocimento pa Aruba como e ‘Best of the Best’ #1 den Caribe. Na 2019, ABC Tours a wordo reconoci den e di tres lugar ariba e lista di ‘Top 10 Caribbean Experiences’, como e ‘Island Ultimate Jeep Safari’.

Esaki ta nifica cu pa a logra esaki a haci diferente cambio y mehora pa por a yega na e #1 aki. A haci mehoranan pa eleva e experiencia di e bishitante y hibe na un otro nivel. 

            Apesar cu e aña aki, e pandemia di Covid-19 a pone cu turismo di Aruba a haya un sla fuerte. E deseo di e turistanan pa bishita Aruba ta prevalece. Y ora cu frontera cu Merca a habri, hopi bishitante tabata ansioso di por bin Aruba y disfruta di nan vakantie den un lugar ‘safe’ manera Aruba. 

            Mas cu claro, e compania ta sigui tur e protocolnan estableci door di Departamento di Salud pa asina por ofrece na e bishitante y e local e seguridad cu tur ta spera di haya na un nivel mas eleva. Tur dia, e vehiculonan ta wordo haci limpi pa medio di un makinaria special pa cu e limpieza, cual no solamente ta saca awa cu presion durante e limpieza, pero e ta crea un capa di foam habon” pa desinfecta y na final ta ‘hot pressure’ na 60 grado Celsius.

            Despues di esey, tur vehiculo ta wordo ‘sanitized’ prome cu e usuarionan subi of ta haci uzo  di dje. Cu esaki ta sigura cu ta cumpliendo cu tur protocol y cu no ta bay core riesgo di contagio.  

            Ademas di e protocolnan relaciona cu Covid-19 ta bon pa menciona cu ABC Tours tin su ‘Safety Briefing Room’ unda ta informa e cliente di tur protocolnan pero tambe ta conscientisa nan riba e importancia pa yuda cuida Aruba y unda ta duna e cliente consehonan ariba siguridad como tambe ariba proteccion di Aruba su medio ambiente.

            E bishitantenan ta apreciando tur loke ta wordo haci y te hasta nan ta skirbi riba esey den nan ‘reviews’.

            Tin un protocol tambe caminda a introduci un ‘Safety Officer’ pa educa y conscientisa e turista riba cuida y proteha Aruba su naturalesa.

            Adicionalmente e velocidad maximo di e jeeps y UTV’s a keda reinforsa pa garantisa comportacion durante ‘off-road’ por ehempel na Parke Nacional Aruba cu maximo di 20 km/h.

            Teniendo cuenta cu e shoconan y su neishinan, cual ta un simbolo nacional, pariba di Lighthouse, e ‘UTVTours route’ a wordo adapta pa no core mas den e direccion aki. 

            Pa loke ta TripAdvisor, e reconocimentonan aki ta a base di e feedback cu nan ta haya di e miyones di usuarionan relaciona cu e mihor experiencianan na mundo. Nan ta na analiza e ‘reviews” y a base di esey nan ta scoge loke nan ta considera e top actividadnan.

            Marvin Kelly, Propietario di ABC Tours a laga sa cu e ta masha contento cu e reconocimento aki un biaha mas. Como empresario local, e ta haya cu esaki ta un ‘push’ pa sigui ofrece un producto di nivel halto.

            No por laga sin menciona empleadonan ya cu sin nan e logro aki no lo tabata posibel. Nan ta asina apasiona cu loke nan ta haci y asina frontera a habri nan ta dunando tur loke nan tin pa comparti cu e bishitantenan.   “Un elogio na nan pa nan empeño pasobra ta evidente cu nan ta stima loke nan ta haci”, Kelly a remarca.

            ABC Tours ta cla pa celebra 25 aña den mercado turistico di e isla y sigur e reconocimento aki ta un motivacion grandi pa e empresa y un logro pa Aruba den su totalidad.

Share:

Leave a Reply

Your email address will not be published. Required fields are marked *