Booshi Wever: SIN TRANSPARENCIA NO POR TIN UNION Y SIN UNION NOS TA PERDE NOS STATUS APARTE

Aruba parce di ta mas dividi cu nunca. Siman pasa diaranson, nos Prome Minister a reuni cu partidonan politico cu a participa na e ultimo eleccion y apesar cu e contenido di e condicionnan Hulandes no tabata conoci, partidonan politico a uni pa defende e causa Arubano cu ta e Status Aparte. UPP por cierto tabata e unico partido cu a haci entrega di un documento, un “position paper” cu splicacion di e posicion di nos partido encuanto e situacion actual. Durante e supuesto “cumbre” aki, Prome Minister a bisa cu e no por duna posicion di gobierno di Aruba ainda. Remarcabel ta cu na ningun instante Minister President tabata tin e gentilesa di a informa e presentenan, cu un rato despues e lo ta saliendo pa Hulanda pa asina ta presente na reunion di diabierna dia 10 di juli.

UPP a duna oido na e peticion pa e cumbre politico apesar di tin cierto reservanan. Motibo di e reservanan tabata tin di haber cu e temor di wordo “voor het karretje gespannen”, esta cu e cumbre probablemente lo mester a fungi como un sorto di “smoke screen” pa por convence Hulanda cu tin un proceso, pa yega na un “algemeen en politiek draagvlak” pa e exigencianan Hulandes. Pues mientras ta puntra solidarismo, na e mesun momento ta tene hopi cos scondi manera por ehempel e hecho cu no ta di awor deliberacionnan cu Hulanda tabata andando.

Na momento cu e prome documentonan a leak, esta e “landenpakket”, nos di UPP a bira mas preocupa, mirando cu nos autonomia, nos Status Aparte, e klompi di diamante, ta wordo menasa. Es mas despues cu e documento oficial, via di Parlemento Hulandes a bira mas conoci, pa nos a bira con cla cu di berdad e intencion di Hulanda ta pa re-colonisa e islanan aki. Algo cu UPP a bin ta adverti for di basta tempo caba. Es mas, banda di ta habraca nos autonomia, e intencionnan di Hulanda ta parce di bay den direccion di caba cu e pueblo Arubano, e identidad Arubano por completo, mescos cu ta bin ta sosodiendo na Bonaire.

E intencion di e reunionnan di diaranson ultimo tabata tin e intencion pa crea e union necesario pa por negocia cu Hulanda, pero despues di a tuma nota di declaracionnan haci door di sr. Knops y door di Min-Pres nos ta mas preocupa  cu nunca pa e futuro di nos Status Aparte. UPP ta di opinion cu enbes di union, e deliberacion na Hulanda a ocaciona mas division. Un division cu a bira obvio ora cu Secretario di Estado Knops magistralmente a tira culpa di e debacle financiero riba partido AVP(OR), dunando POREDmep un rosea politico. Mientras cu di e forma aki nos no ta realisa, cu Knops ta laba cabes di Hulanda, cu tambe ta complice den e desaster financiero cu nos pais ta pasando aden. Enbes cu nos hendenan wak kico realmente Knops y Hulanda ta haciendo, nos ta sinta kibra otro aki na Aruba. Di un banda euforia, no pa loke a wordo logra, pero euforia pasobra Knops a colga gabinete Mike Eman I y II, mientras di otro banda esnan cu ta para tras di Mike Eman y AVP ta purba di acusa e gabinete actual di ta esun cu ta entrega autonomia na Hulanda.

E desaroyo aki ta pas precies den e intento hulandes pa crea division y surgi como e gran vencedor cu a acumula un poder casi absoluto. E gran perdedor den tur esaki lo bay ta e ARUBIANO. E ARUBIANO ta esun cu ta bay sufri, pasobra e tin di paga pa e fiesta cu e no tabata parti di dje. Tanto tempo di AVP(OR) y awor esun di POREDmep.  Tristo e situacion aki. Si nos mira p.e. cu ya caba e gobierno actual a flexibilisa importacion di mas trahadornan stranhero, loke cu Prome Minister mes a reconoce. E medida aki  ta surgi como un di e condicionnan hulandes pa haci mas fasil pa mas hende bin establece na Aruba.

Admitiendo cu ya caba a elimina tur “BELEMMERINGEN” pa e trahador stranhero y bayendo di acuerdo cu famia di e “rijksgenoten” ta “van rechtswege toegelaten” e ARUBIANO lo no ta riba “highway 2 hell” pero riba e “SPEEDWAY 2 HELL”!!

Y pa colmo esakinan  ta bai empugna cu loke cu Hulanda mes a acorda cu Nacionnan Uni na 1954!!

Na e momentonan aki no tin suficiente trabou ni pa ARUBIANONAN ni pa esnan estableci aki na Aruba. Anto sin cu bin cu ningun clase di proyecto, kier bay agilisa mas binimento di mas hende di afo. Realmente e intencion na e momentonan aki parce di ta pa nos caba cu loke nos ta considera ARUBIANO. UPP ta di opinion cu e ARUBIANO, esun cu a lanta e pais aki y pone tur hende bin haya un biba aki, ta wordo stigmatisa. Ta wordo poni riba e altar di sacrifico, tanto pa Hulanda su exigencianan y tambe pa esnan cu ta simpatisa Hulanda. Si ARUBIANONAN no lanta para, nos por wel lubida autonomia, Status Aparte, Betico Croes, nos Bandera y Himno.

Partido UPP

Booshi Wever

14 di juli 2020

Share:

Leave a Reply

Your email address will not be published. Required fields are marked *