Canadian Bank Note Company, Limited (“CBN”) y Canadian Bank Note (Aruba) N.V. (“CBNA”) desde 2012 ta encarga cu maneho y operacion di Lotto, e loteria di Aruba. CBN ta agradecido pa su relacion cu pais Aruba cu ta data desde aña 1999. E companianan ta orguyoso di nan aporte na Aruba su comunidad, muy en particular riba e fondonan cu nan esfuerzonan a haci posibel pa deporte cuminzando na 2012.
Cu e situacion penibel na nos isla den mente, a busca manera pa haci un contribucion adicional cu lo haci un impacto riba e situacion actual. Den pasado caba a haci donacion na beneficio di nos pais varios biaha. Den cuadro di esaki a logra di partner cu Fundacion pa nos Comunidad pa cu donacion di pakete di cuminda na esnan cu mas ta den necesidad aki na Aruba. A importa un container di cuminda cu ta ensera un total di 55.000 pakete di cuminda, cual Fundacion pa nos Comunidad lo reparti entre esnan mas den necesidad. Diaranson, 1 di juli ultimo, oficina di Lotto principal na Oranjestad y San Nicolaas a sera su porta parti mainta pa publico, pa asina a duna un man cu e paketamento di e cumindanan cu a wordo importa.
Renaissance Hotel y su gerente general, Sr. Paul Gielen, tawata asina amabel di haci un sala disponibel pa por paketa e cuminda pa tres dia largo. Tawata un mainta ameno, caminda empleadonan di e loteria y voluntarionan di e fundacion a colabora cu otro pa forma paketenan.
CBN y CBNA ta aplaudi y gradici Fundacion pa nos Comunidad pa nan contribucion na nos pais. E personanan cu ta desea di haya yudansa por tuma contacto cu e fundacion via e number di nan oficina, cu ta 5880002 of por registra online na: https://www.fpnc.aw/aplicacion-online/.
