Diabierna y diasabra anochi, na Faro Blanco Restaurant a tuma luga e entrega di diploma di VWO y di HAVO di Colegio Arubano. Debi na Covid, e celebracionnan aki a bay diferente cu locual ta e custumber pero na un manera hopi bunita. E graduadonan y nan famia tabata hopi bunita bisti y naturalmente tabata hopi feliz pa e logro di a caba VWO y HAVO exitosamente. Por a nota tambe e alegria y satisfaccion di tur docente y mentor presente cu e logro di nan alumnonan.
Como parti tradicional di e ceremonia, e Prome Minister di pais por entrega e diploma na e miho graduado di VWO y HAVO. Pa Prome Minister Evelyn Wever-Croes esaki tawata un gran honor pa entrega diploma na e miho graduado di VWO, Priscilla Quandt y e miho graduado di HAVO, Denise Mulder.
Prome Minister a tuma e oportunidad pa felicita e graduadonan y nan famia y a desea nan tur cos bon den e etapa nobo cu nan ta drentando recordando nan cu unda cu nan bay, nan ta embahadonan di Aruba. Prome Minister a encurasha cada un pa nan persevera den e proximo etapa nan dilanti y sigui padilanti cu un meta bon fiha pa no laga nada desvia nan di esaki.
Prome Minister Evelyn Wever-Croes: “Aruba ta orguyoso di bo, Aruba tin mester di bo, Aruba ta spera bo brasa habri pa bin yuda nos desaroya nos economia. Pabien!”.
