Rocco Tjon: Candelaria (AVP) tambe ta desaproba mocion van Dam (CDA)

Cu deasaprobacion di e mocion di van Dam, Robert Candelaria ta admiti cu Ministerio Publico y Husticia ta funciona imparcial. Esaki contrario na loke Mike Eman a insinua cu Ministerio Publico lo ta un instrumento politico.

Durante ultimo reunion di comishon fiho di Husticia a elabora riba e mocion di Chris van Dam (CDA). Den e mocion, cual no a wordo trata ainda den Parlamento Hulandes, e Parlamentario Hulandes ta desea pa Husticia bira un asunto di Reino.

REUNION COMISHON FIHO DI HUSTICIA

Siman pasa sr. Rocco Tjon MBA a yama un reunion cu Minister di Husticia pa entre otro trata e topico aki. Minister di Husticia sr.mr. A. Bikker a duna un splicacion amplio dicon e no ta di acuerdo cu e mocion. E splicashon tawata uno cual ta enfoca riba aspectonan constitucional y practico. Minister a duna di conoce tambe cu e ta asombra cu e deseo di e politico Hulandes pa e motibo cu durante reunionnan cu e ministernan di Husticia di Reino e topico aki nunca a wordo treci pa dilanti.

POSISHON PARLAMENTO DI ARUBA

Ningun fraccion cu tawata presente durante e reunion di comishon ta di acuerdo cu e argumentonan di sr. van Dam. E Parlamentario Hulandes ta insinua cu mirando e grandura di nos islanan, comunidadnan chikito, Husticia no lo por funciona optimal ora ta trata investigacionnan di casonan coruptivo.

Remarcabel ta cu despues cu lider di partido AVP, Mike Eman, a ataca Ministerio Publico frontal e miembro di CDA a trece e mocion aki den Parlamento Hulandes. Den e comishon fiho sr. Candelaria tambe a duna di conoce cu e no ta di acuerdo cu e ponencia di sr. van Dam y ta sostene fraccionan di coalicion pa e punto aki no subi agenda di IPKO. Di e manera aki sr. Candelaria ta admiti indirectamente cu nos Ministerio Publico ta funciona imparcial y no ta un instrumento politico manera Mike Eman a insinua siman pasa.

PA CONCLUI

Aworaki e decision di e comishon aki lo bay wordo ancra den un desishon di comishon central. Nos ta pensa cu tin diferente aspecto riba tereno di Husticia riba cual por conta cu un colaboracion mas intenso entre e paisnan den Reino. Pero como pais autonomo e ta keda na Aruba pa atende cu Husticia den e caso aki.

Share:

Leave a Reply

Your email address will not be published. Required fields are marked *