Booshi Wever: AWOR TA E MOMENTUM PA PONE A ARUBIANO CENTRAL.

Despues di a tuma nota cu gobierno a cuminza suavisa e medidanan impone pa por contene e plamamento di COVID-19, nos ta puntra nos mes si gobierno a haci un evaluacion cu si den e negoshinan cu lo bay cay den e proceso aki, cuanto ARUBIANO ta trahando den e sectornan aki. Ya caba algun negoshi, cu durante e “shelter in place” a keda habri, nos tabata tin e interogativa aki. Di e tienda-, negoshi- y restaurantnan/take away, cuanto ta e ARUBIANONAN trahando den esakinan?

E prome pregunta cu ta bini den nos mente ta, cu aparte di e aspecto medico cu si Jobcenter a ser involvi den e proceso aki. Y si Jobcenter a wordo involvi, cuanto ARUBIANO den e sectornan aki ta desemplea y cuanto  personanan cu tin un permiso ta trahando den e sectornan aki?? Kico ta e preferencia cu lo bay duna den esaki?

Nos ta puntra esaki pasobra nos no ta kere cu por ta asina cu nos ARUBIANONAN ta keda cas sin trabou y otronan cu ta “vergunninghouder” ta keda cu nan trabou. E base pa duna un permiso pa estadia y di trabou ta cu NO tin un ARUBIANO pa haci e trabou aki. Pues si tin ARUBIANO pa haci e trabounan aki den sectornan aki, NO por bay over na duna un permiso of prolonga dicho permiso na uno trahador di afo.

Un otro asunto cu tin di haber cu henter e asunto aki ta e informacion cu ta yega cerca nos cu e negoshinan cu ta manda placa afo, constantemente ta yen. Ta hopi obvio cu mester tin placa pa manda afo. E ora e pregunta ta si ta e 950 florin cu ta ser duna, ta wordo manda afo? Si esaki ta e caso, dicon no ta duna bonnan pa cuminda? Haciendo esaki en todo caso e placa ta keda circula aki ta Aruba mes.

Loke nos niun no mag di lubida, cu nos gobierno, esta e pueblo, ta prestando placa pa duna e 950 florin aki (y cu ta na su lugar). Esaki kiermeen cu despues nos TUR lo mester bai paga back. Y esaki, si nos mester ta orguyoso pa paga back, nos mester ta hopi cauteloso con ta maneha e placa aki y mester tin control rigido y estricto den esaki. No por bai hunga Sinterklaas cu esaki. Ta pesey ta un “must” pa mara mannan di e politiconan!! Pa evita cu aki tambe pa via di populismo y di kier score politicamente, ta bay parti placa, cu mañan al final ta nos pueblo lo tin di paga bek. Pesey nos ta bolbe puntra, gobierno no por a yega na un manera pa enbes di duna e ayudo den placa esaki bay den forma di bonnan, cu nan por busca na supermeracadonan? Of cu por a busca na un centro di distribucion?

Awor e palabra  “NORMAL NOBO” cu ta wordo hopi usa, por ser aplica aki tambe na unda e ARUBIANO tin cu bai conta atrobe. Pesey nos ta kere cu awor aki tambe ta e momento husto pa re-introduccion di e “Swiss-model” cu lo ta sirbi e meta aki,pero tambe nos fondonan social. Nos mester corda cu den e modelo suizo aki, ta conta tambe cu den e caso EXCEPCIONAL lo por otorga permiso na p.e. esnan entre 25 y 40 aña y cu nan MESTER  pasa un test medico pa malesanan contagioso y cronico. 

Y despues di MAXIMO 3 aña nan mester sali. 

Esaki sigur mester forma parti di e “HERVORMINGEN” cu Hulanda ta pidi desde 2014 caba, cu e gobiernonan AVPOR y POREDmep cada bez ta “stel uit” perhudicando nos pueblo pa basta tempo caba pero cu awor dor di e crisis aki a bira mas visibel y cu mester ser soluciona.

E careda di cabai cu tin Parlamento no ta yuda pa trece e solucion.  E situacion precario aki ta exigi cu e Parlamento “nobo” stop cu e muchachada cu nos a bin ta mira e ultimo añanan y trece e cambionan real cu mester bin. Awor realmente mester  pone Aruba y e ARUBIANO na prome lugar.

Partido UPP

Booshi Wever

30 di april 2020

Share:

1 thought on “Booshi Wever: AWOR TA E MOMENTUM PA PONE A ARUBIANO CENTRAL.

  1. Pregunta…boso a jega di pensa cu hende por RICICBI plaka tambe?? Y ademas NO tur hende ta bashi y SI por tin plaka. Awo den tur esey lo tin hende cu SI lo abusa di e sistema, pero esey bo NO por evita. Gobierno NO por sera e luga nan aki paso hopi hende na Aruba ta esnan cu ta traha y cu ta manda pa mantene nan yui nan den otro pais.

Leave a Reply

Your email address will not be published. Required fields are marked *