Booshi Wever: AVE POPULISMUS! AVE OPPORTUNISMUS! REGUM CORONA HABEMUS?

Pa varios siman caba UPP a bin ta pidi gobernante-, parlamentario- y otro politiconan pa stop di ta populista, hunga heroe of salbador memei di pandemia aki. Asina nos por mira politiconan ta hunga populista, entregando ayudo na esnan necesita, no den un forma modesto of humilde, pero yen di fanfaria. Tin un dicho bieu, cu ta bini di Mateo 6:3 cu ta bisa “Ma abo, ora bo ta duna esnan cu ta den necesidad algo, no laga bo man robes sa kico bo man drechi ta haci”. Den papiamento crioyo esaki ta cambia tambe den “Loke bo man drechi duna, man robes no mester sa.” Y hopi, particularmente e fanaticonan, no ta mira cu esaki ta un obra populista y oportunistico, pa haya atencion y asina gana curazon di hende.

E show mas grandi ta keda esun di entrega di salario dor di nos Parlamentarionan. Fin di maart, ora di trata presupuesto di pais Aruba, parlamentario Howell y AVP kier a entrega 1000 florin pa un periodo di 3 luna. Esaki a trece un conmocion enorme den seno di e coleganan di coalicion, unda a tilda Howell publicamente di ta un POPULISTA! Rechasando esaki, e dos partidonan di coalicion REDmep, a bin cu un proposicion pa entrega 10% di salario, pero te cu fin di aña. Pero Howell no kier a keda atras y bisa cu e lo por entrega hasta 25% y cu su coleganan lo bay haya les for di dje pa e forma cu nan a trate. Parlamentario Ricardo Croes di RED a bay asina leu di acusa Howell di tin contrato di 35.000 florin pa luna cu Serlimar. 

Despues cu sindicatonan a cuminsa haci fastioso, e corte salarial a bira 20% fin di siman pasa, mientras den e reunion cu  Parlamento a yama den pura cu e sindicatonan, nos por a tende caba for di parlamentario Arthur Douwers kico por spera di nan banda! Y den e reunion di prespuesto di Parlamento esaki a bira 25%.

Asina aki e comedia, AVE POPULISMUS! AVE OPPORTUNISMUS! REGUM CORONA HABEMUS? (= Populismo y Oportunismo den gran forma! Ken ta bay cu e corona?) tabata sigui. Pasobra mientras cu nan ta bringando pa e corona di populismo, den nan afan oportunista pa memei di e crisis cu ta dal nos duro, score punto cerca e pueblo, tur e show aki ta mas bien desvia atencion di pueblo pa loke ta nos problema real. 

Esaki ta e “hervorming” (=reforma) cu Hulanda desde 2014 a bin ta pone atencion riba dje. E reforma cu lo nificia “E BERDADERO NORMAL NOBO” cu ta ensera un set di leynan cu mester percura pa mara mannan di e politiconan! Tambe, manera Hulanda for di ora cu e crisis a dal nos duro, den bos mas duro a bisa, cu mester bin un “herziening” (=reforma) di e structura salarial aki na Aruba. Un aspecto cu nos a scucha nos Prome Minister Evelyn Wever-Croes bisa algun dia pasa, cu e no tin tempo pa atende esey na e momentonan aki.

Pero loke ni Parlamento y parse ni gobierno kier realisa ta, cu tur otro maniobranan ta nifica cu nos lo keda depende di e limosna di Hulanda, na unda cu nos lo sigui entrega mas di nos autonomia. Pida pa pida, manera difunto Helman Wiels a yega di bisa, cu e lacayo di Hulanda Mike Eman, ta permiti pa poco poco nan schaaf na e Status Aparte di Aruba. Y desde 2014, apesar di un cambio di gobierno na 2017, nos ta mira cu poco a sosode riba e terenonan aki na Aruba.

Contrario na hopi cu ta pensa otro, UPP si ta kere cu e situacion di crisis cu a presenta aki, no ta sirbi solamente como un momento di “wake-up”, sino di tuma accion. Nos mester realisa cu a yega e momento pa nos “re-diseña” e rumbo cu nos kier pa nos pais Aruba bay! Esaki por wordo haci den un Dialogo Nacional, yegando asina na un Comprimiso Nacional unda ta bin cu e.o. reglanan estricto di Bon Gobernacion pa MARA MAN DI E POLITICONAN. Asina aki nos ta regla nos asuntonan nos mes y nos ta mustra Hulanda cu nos mes ta pone asuntonan na ordo. Di e manera ey nos ta obliga Hulanda di por cumpli cu nos tambe, sea den duna un “schenking” of duna un “zachte lening”. Cu e pasamento di 25% den Parlamento, e careda di bina no a caba ainda. E bala keto bay ta den nos  cancha, ban pone Aruba hunto “back on track”!

Partido UPP

Booshi Wever

30 di april 2020

Share:

Leave a Reply

Your email address will not be published. Required fields are marked *