Rocco Tjon: Ningun momento Gobierno ta duna CITGO placa ora termina e relacion.

Te hasta durante e crisis actual AVP ta trata na malinforma pueblo y asina obstaculisa oportunidadnan nobo pa pais Aruba. Nan a bay asina leu di te hasta manda carta pa Gobernador, Gobierno di Hulanda y Parlamento di Hulanda pa asina trata di perhudica Aruba. Nos ta lamenta e actitud aki y ta haya necesario pa duna splicacion riba e ley pa termina relacion cu CITGO.

GARANTIA DI 150 MIYON DOLLAR PA DESMANTELACION

Ningun momento Aruba ta regalando CITGO 340 miyon florin manera AVP ta pretende. Al contrario, ta asina cu Gobierno di Aruba a logra den e negosacion pa CITGO cumpli cu e pago di 28 miyon florin di impuesto cu nan debe y a percura pa tur empleado haya un pakete segun nan añanan di servicio.

E claim cu ta wordo dispensa ta un claim riba desmantelacion. Manera ta conoci CITGO no a cumpli cu inversionnan cu mester a tuma lugar esaki debi na sancionnan Mericano. Si Gobierno di Aruba dicidi cu kier desmantela anto CITGO ta esun responsabel pa desmantela. Y e desmantelacion aki ta wordo balora na un suma maximo di 150 miyon dollar. Kiermen ningun momento CITGO mester paga Aruba e suma di placa aki. Mas aun ainda Aruba lo mester bringa esaki den arbitrahe internacional, un proceso cu lo dura hopi aña sin ningun garantia pa Aruba. Y si Aruba gana e caso aki mes, CITGO ta wordo obliga pa desmantela e refineria pero no pa paga pais Aruba e suma di 150 miyon dollar.

REUNIONNAN PUBLICO DEN PARLAMENTO

Ta importante pa nota cu na diferente momento prome minister, sra. Evelyn Wever-Croes a bin Parlamento, den “openbare bijeenkomsten” pa splica exactamente desaroyo di CITGO. Na varios ocasion prome minister a splica tambe cu negosacionnan ta andando pa yega na terminacion di e contract y pa asina aki Aruba haya un oportunidad nobo pa stimula y diversifica nos economia. AVP tambe ta na altura cu OFAC ( USA) a pone embargo, esta sancion riba CITGO y cu nan ni PDV Holding tin placa pa cumpli cu inversionnan.

ESTUDIO RIBA MEDIO AMBIENTE

Tin un acuerdo mutuo cu lo laga un compania externo haci un “base line study” ( nulmeting) riba e parti di tereno cu Citgo lo por a contamina den e periode entre 2016 pa 2020. Y esaki lo wordo exonera y esaki lo por suma maximo na 25 miyon. Pero e realidad ta cu Citgo no a opera mes y e daño real na e tereno lo ta un suma mucho mas abou.

PA CONCLUI

Ta sumamente importante pa remarca cu Citgo no a percura pa mantencion debido na e refineria. Pues si pais Aruba drenta den un bataya legal, cual lo dura hopi aña, e refineria lo deteriora mas y pais Aruba ta perde un oportunidad unico. Durante e bataya legal aki nos no lo tin control riba e refineria y e tankinan. Y esaki por trece suministro di fuels pa Aruba na peliger, pero tambe Aruba lo perde oportunidadnan den storage cu ta representa miyones na entrada pa Aruba.

Pues nos ta lamenta cu AVP ta trata na crea mas panico ainda, durante e crisis actual. Esaki no ta momento pa AVP pone nan interes personal y di nan partido prome cu bienestar di nos pueblo. Esaki ta un oportunidad unico pa Aruba por bay capitalisa riba oportunidadnan economico nobo cu por mitiga e impacto economico di e crisis actual.

Share:

1 thought on “Rocco Tjon: Ningun momento Gobierno ta duna CITGO placa ora termina e relacion.

Leave a Reply to Angel Flanegin Cancel reply

Your email address will not be published. Required fields are marked *