ORANJESTAD – Diamars dia 28 di januari 2020 a tuma luga e tercer dia di workshop pa Studentenraad unit S&S di Colegio EPI cu ta trata Mediawijsheid. E topico riba e dia aki tawata papia den publico cu a haya cooperacion di e orador Mark Benson.
Durante e atardi aki, e grupo di studiantenan a haya un splicacion tocante papia den publico cu nan sigur lo por uza durante nan tareanan den studentenraad y tambe durante nan estudio, trabou y bida diario. Durante e splicacion di papia den publico a bin dilanti varios tips and tricks, por ehempel con pa anda cu insiguridad, tene cuenta cu tempo, haci contacto di wowo cu publico grandi y chikito, mantene un postura corecto y tambe tono di bos. Na final di e presentacion e studiantenan a haya oportunidad pa intercambia informacion di nan propio abilidad pa cu e topico aki di papia den publico.
Begeleiders di Studentenraad di Unit S&S di Colegio EPI ta gradici Mark Benson pa a brinda informacion na nos studiantenan pa asina nan por papia den publico y interactua mas directo pa logra nan metanan. Studentenraad ta e “bos di studiantenan” y e tipsnan aki sigur lo haci nan trabou mas exitoso.
