Oranjestad – Siman pasa Minister Maduro a brinda un reconocemento na sr. Claudius Phillips pa su gran aporte na cultura di Aruba y e gran acohida di su musica den exterior.
Claudius ta un compositor, areglista, pianista, cantante, producer y un entertainer. Claudius a nace na Aruba y a lanta den bario di Colony, San Nicolas hunto cu su mama y 5 otro ruman. Ela cuminsa gusta musica for di edad di mucha y tambe tabata canta tambe den koor di misa
Claudius a participa na edad di 17 aña na su prome festival ‘Valentine Talent Teen Festival’ na St. Maarten y a sali ganador. Despues el participa ‘Talented Teen Festival’ na Aruba y tambe a sali ganador. Dos aña despues na un edad relativamente jong, Claudius a representa Antia Hulandes den e prestigioso Festival di OTI cu a tuma na Washington DC y a sali segundo finalista. Esaki ta un logro hopi importante den su carera musical, ya cu ela competi contra 20 otro cantante popular di paisnan den Latino America. Den mesun aña tambe ela keda corona como Calypso King cu a dune un boost den su carera musical.
Claudius ‘Mighty Talent’ tin un record den Calypso y Roadmarch Contest. Ela participa 25 biaha den e Festivalnan, 13 biaha ela gana tur dos corona, 20 biaha a sali Calypso King y 15 biaha Roadmarch King. Tambe ela yega di composita cancion pa otro cantantenan cu a gana cu su composicionnan. Claudius a coopera grandemente na carnaval cu su grupo di mucha Wizzkids y grupo di hende grandi OPC.
Como cantante y musico Claudius a gana hopi premio local y internacional, djis pa menciona algun for di un lista largo di premio: ela gana Super Star di aña, voz di oro masculino, compositor di decada 1980-1990, Premio Mo Tito y Rufo Wever pa 5 aña consecutivo pa su outstanding performance como un cantante, musico y compositor, musico di aña, Best video-clip di aña y banda di aña.
Claudius tabata forma parti di varios banda musical entre añanan 1980-1990 y na aña 1992 ela lanta su mes banda One Real Exciting Organization (OREO). Cu OREO ela bira mas popular cu varios hit manera: ‘Saca e Boem’, Cuanto mi stima bo, Tuma bo tempo, Haciendo cos romantico y Bisami awo.
Claudius a gana amor, cariño y admiracion pa tur esnan cu ta gusta su cancionnan y musica. E talentoso musico ta biaha regularmente pa Corsou, St. Maarten y Boneiro, Surnam, Hulanda, St. Barths, Anguilla y Merca caminda e tin hopi fanaticada pa duna presentacion. E publico ta baila y gosa non stop na momento cu Claudius presenta cu exitonan. Durante su trayectoria musical Claudius a bay studia musica tambe na Berkley College of Music na Boston.
Claudius ta un entertainer tambe y entretene turistanan cu ta baila y gosa riba su musica na varios hotel na Aruba. Recientemente Claudius a presenta durante Manisfestacion Cultural y a pone un tremendo ambiente, entretene e publico na su manera unico y a pone tur hende lanta baila, canta y gosa hunto cune.
Na nomber di Gobierno, Minister di Cultura a gradici Claudius pa e dedicacion na nos cultura atrabes di su musica cu ta yega na nos hendenan local y internacional. E mandatario a yama Claudius danki pa tur locual ela haci y ta haciendo pa aporta na desaroyo cultural di Pais Aruba y ta spera di por sigui disfruta hopi aña mas di su talentonan musical.
