PETIT COMITÉ TA ENTREGA REGALO NA MINISTER MADURO Y MINISTER ODUBER E cuadranan lo ta un recordatorio pa e compromiso di cada ministerio pa solucion di e problematica di cacho na Aruba

Diamars mainta, miembro di e Petit Comité di e Plan Nacional cu ta atende cu e problematica di cacho riba caya a entrega na Minister Xiomara Maduro y Minister Dangui Oduber nan regalo, cua ta un cuadra pa cada Minister di un di e ganadonan di e concurso di pintamento “Stima bo cacho” cu a tuma luga dialuna 26 di augustus 2019, Dia Internacional di Cacho, pa diaranson 25 di september 2019. E concurso tawata hopi exitoso. E cuadranan cu a wordo regala na e Ministernan a wordo firma door di e artistanan riba e dia cu nan a ricibi nan premio dia 4 di october 2019, esta riba Dia di Bestia.

Cu e cuadranan cu tur Minister a haya, e Petit Comité kier recorda cada Minister di nan compromiso pa cu e plan nacional multidisciplinario aki cu ta rekeri compromiso di di tur ministerio den corto o largo plaso pa e wordo realisa y ta un solucion exitoso y duradero pa cu e situacion di e cachonan na Aruba.

Prome Minister Evelyn Wever-Croes tambe tawata na e entregamento di premio y a felicita ambos Minister cu nan bunita cuadro pinta pa nos muchanan den e concurso pa conscientisa nan riba e cuido di mascota y asina crea un base solido di doñonan cu ta cuida nan mascotanan di forma responsabel. Ta spera cu cada Minister pone e cuadranan aki na un luga special.

Share:

Leave a Reply

Your email address will not be published. Required fields are marked *