Rocco Tjon: Parlamento a fiha fecha pa entrega pregunta riba “ley di identificatieplicht”.

Ayera den un reunion di comicion central Parlamento a dicidi cu e ultimo dia pa entrega pregunta riba e “ley di identificatieplicht” ta bira 17 di januari 2020. E Parlamentarionan cu a entrega e ley aki, esta sr. Tevreden y sr. Tjon, lo tin tempo despues pa contesta e preguntanan aki pa despues e ley por wordo trata.

LEY DI “IDENTIFICATIEPLICHT”

E necesidad pa introduci e ley aki ta pa por combati criminalidad mas eficaz. Un mihor mantencion di orden di regla y mas seguridad den area publico, por wordo logra cu introducion di un obligacion pa identifica bo mes si polis puntrabo pa haci esaki den cuadro di ehercemento di su tarea

E ta un instrumento cu ya caba ta wordo uza den diferente parti di mundo y Reino. Na un banda e ta hisa seguridad pa tur ciudadano, pero di otro banda e ta eleva seguridad tambe pa e oficial cu ta eherce su tarea.

REGLA DI EVALUACION

Den e ley a incorpora un regla di evaluacion pa garantisa cu despues di 3 aña ta evalua con eficaz y eficiente e instrumento tawata. Ta importante pa midi si e meta pa cual a introduci e ley wordo logra of si mester quizas adapta e ley.

Importante pa bolbe acentua cu e ley aki lo percura pa hacie posibel pa polis por determina identidad di un persona si esaki ta necesario pa e eherce su tarea. E persona en cuestion tin pues un obligacion pa mustra e polis su papel di identificacion. Consecuentemente esaki lo eleva seguridad den areanan publico pero tambe pa e oficialnan den ehercemento di nan funcion.

CAMPAÑA DI CONCIENTISACION

Tambe a señala e necesidad pa prome cu e ley drenta na vigor bin cu un campaña di concientisacion. Esaki pa splica na pueblo e indole di e ley, e obligacion pero tambe e derecho di cada ciudadano. Tambe cada polis y “bijzondere opalsporingsambtenaar” lo mester sigui un curso y training pa e uzo di e instrumento aki.

PA CONCLUI

Den e simannan nos dilanti nos lo saca structuralmente articulonan informativo riba diferente partinan di e ley. Esaki pa splica pueblo exactamente kiko e ley ta ensera.

Share:

Leave a Reply

Your email address will not be published. Required fields are marked *